«Белсат» падводзіць вынікі 850-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 22 чэрвеня чытайце ў нашым аглядзе.
На поўначы Харкаўскай вобласці асноўныя баявыя дзеянні лакалізуюцца на двух участках фронту – побач з сялом Глыбокае (Харкаўскі раён) і на тэрыторыі гораду Ваўчанск і ягоных ваколіцаў (Чугуеўскі раён). Прарасейскія крыніцы пішуць, што ініцыятыва захоўваецца за Збройнымі сіламі Украіны, якія контратакуюць, імкнучыся выціснуць праціўніка з займаных пазіцыяў. Адначасова з гэтым працягваецца назапашванне рэзерваў і пошук слабых месцаў у абароне расейцаў.
Праўкраінскі тэлеграм-канал «Говорять Снайпер» паведамляе, што ў гэты ж час войскі РФ засяродзіліся на нанясенні авіяцыйных удараў па пазіцыях ЗСУ і шляхах падыходу да іх.
У Генеральным штабе Збройных сілаў Украіны паведамілі, што цягам апошніх содняў на купянскім і ліманскім кірунках Сілы абароны краіны адбілі шэраг атак праціўніка ў ваколіцах населеных пунктаў Стэпавая Навасёлаўка, Мясажарыўка, Стэльмахаўка, Андрэеўка, Неўскае і Церны. Сітуацыя на гэтых участках фронту застаецца кантраляванай.
У гэты ж час у Міністэрстве абароны РФ заявілі, што іхным вайскоўцам удалося палепшыць сваё становішча каля сёлаў Сынькоўка, Петрапаўлаўка, Торскае, Церны і Дзіброва.
На так званым сівэрскім выступе па фронце (у ваколіцах гораду Сівэрск) расейцы ціснуць на пазіцыі ЗСУ побач з сёламі Верхнякаменскае, Спірнае, Выемка і Раздолаўка.
Прарасейскі тэлеграм-канал «Архангел Спецназа» сцвярджае, што ў апошнім населеным пункце штурмавыя групы УС РФ выбілі праціўніка з апорных пунктаў на ўсходніх ускрайках, а таксама замацаваліся на двух вуліцах сяла.
На краматорскім кірунку войскі РФ наступаюць ва ўсходняй частцы гораду Часаў Яр і на ягоных флангах, паступова выціскаючы ўкраінцаў за канал Сівэрскі Данец – Данбас.
Прарасейскі тэлеграм-канал «Рыбарь» піша, што УС РФ выбілі праціўніка з руінаў заводу «Гідражалезабетон» у мікрараёне Канал, у выніку чаго пад кантролем ЗСУ засталася толькі паўднёва-заходняя частка забудовы, якая ляжыць за каналам (асноўная частка гораду знаходзіцца на захадзе ад воднай перашкоды).
Акрамя гэтага крыніца фіксуе рух расейцаў на поўначы ад гораду – у сяле Калінаўка.
На паўднёвым фланзе ідуць баі па лініі населеных пунктаў Іванаўскае – Клішчыеўка і Курдзюмаўка, але зменаў не фіксуецца.
Цяжкую сітуацыю для ЗСУ на краматорскім кірунку пацвярджаюць і самыя ўкраінскія вайскоўцы.
Працягваецца наступ УС РФ і ў ваколіцах Тарэцку. Аналітыкі праекту Deepstate пішуць, што на ўсходзе ад гораду яны занялі населены пункт Шумы, а таксама прасунуліся ў сяле Паўночнае.
Тэлеграм-канал «Говорять Снайпер» мяркуе, што расейцы дасягнулі поспеху на гэтым кірунку за кошт удару падчас правядзення ратацыі на ўкраінскіх пазіцыях.
На пакроўскім кірунку працягваецца рух войскаў РФ на захадзе ад гораду Аўдзееўка.
У Deepstate фіксуюць іхныя прасоўванні ў сяле Сокал.
Прарасейскі тэлеграм-канал «НгП раZVедка» сцвярджае, што Узброеныя сілы РФ прабіліся ад сяла Новааляксандраўка да суседняй Ваздвыжанкі і зайшлі на паўднёва-ўсходнія ўскрайкі гэтага населенага пункту.
Адзначаецца, што захоп Ваздвыжанкі дазволіць расейцам выйсці да трасы Т-0504 Пакроўск – Канстанцінаўка, што істотна пагоршыць становішча ЗСУ на ўсім усходнім фронце.
Праўкраінскі «Офіцер» піша, што на поўдні кірунку УС РФ прабіліся да цэнтральнай часткі сяла Карлаўка, дзе цяпер працягваюцца цяжкія баі.
Тэлеграм-канал «Два майора» паведамляе, што на курахаўскім кірунку Узброеныя сілы РФ расшырылі зону кантролю ў горадзе Краснагораўка.
Ніжэй па фронце працягваюцца баі каля сёлаў Максімільянаўка, Георгіеўка і Канстанцінаўка.
На паўднёвым участку фронту ў Данецкай вобласці расейцы цягам содняў зноў атакавалі ў ваколіцах населеных пунктаў Вадзяное і Старамаёрскае, але прасунуцца не здолелі.
Адсутнічаюць змены і ў цэнтральнай частцы Запарожскай вобласці, дзе баі лакалізуюцца на выступе па фронце каля гораду Арэхаў.
У Херсонскай вобласці фіксуюцца сутыкненні на левым беразе Дняпра на ўчастку паміж сёламі Крынкі і Казачыя Лагеры, а таксама ў ваколіцах Антонаўскага моста.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu