У расейскім Растове тэрарысты захапілі закладнікаў у СІЗА і заявілі, што здавацца жывымі не будуць
У следчым ізалятары ў Растове-на-Доне зняволеныя ўзялі ў закладнікі двух ахоўнікаў. Як паведаміла рэгіянальнае ўпраўленне Федэральнай службы выканання пакаранняў, цяпер ідуць перамовы. Паводле звестак Telegram-каналу «112», злачынцы запатрабавалі машыну, каб уцячы, і заявілі, што жывымі здавацца не будуць. Яны назвалі сябе чальцамі тэрарыстычнай арганізацыі ІГІЛ.
Захоп двух супрацоўнікаў растоўскага СІЗА пацвердзілі ў Федэральнай службе выканання пакаранняў.
«Ідуць перамовы аб вызваленні закладнікаў. Установа функцыянуе ў штатным рэжыме, абстаноўка кантралюецца», – запэўнівае ведамства.
Telegram-канал «112» апублікаваў некалькі відэа, што знялі самі захопнікі. Яны кажуць пра датычнасць да тэрарыстычнай арганізацыі ІГІЛ, паскардзіліся, што ў Растове «іх братоў саджаюць, даюць тэрміны», заявілі, што іх «падрыхтаваў сам Алах» і што жывымі яны здавацца не будуць. Злачынцы патрабуюць аўтамабіль і магчымасць уехаць.
Адзін з двух закладнікаў на відэа кажа:
«Людзі настроеныя сур’ёзна. Пачуйце іх».
Захопнікі ўзброеныя нажамі, сякерамі і дручкамі. Імаверна, яны спрабуюць знайсці сховішча агнястрэльнай зброі.
Паводле каналу «Baza», шасцёра зняволеных выбілі краты ў сваёй камеры і трапілі ў дзяжурную частку, дзе схапілі двух супрацоўнікаў.
Медыі таксама распаўсюдзілі дадзеныя пяцёх злачынцаў. Трое з іх у снежні летась былі асуджаныя на 18 гадоў і 18,5 года за ўдзел у «Ісламскай дзяржаве» і рыхтаванні да тэракту. Паводле версіі следства, яны планавалі ўзарваць будынак Вярхоўнага суда Карачаева-Чаркесіі.
Цэнтр Растова, дзе знаходзіцца СІЗА, перакрыты, туды сцягнутыя сілавікі.
Апошні напад у Расеі, за які ўзяла на сябе адказнасць тэрарыстычная групоўка «Ісламская дзяржава», адбыўся 22 сакавіка, калі баевікі (як сцвярджае следства, нарадзінцы Таджыкістану) атакавалі канцэртную залу «Крокус Сіці Хол» пад Масквою. Загінулі 145 асобаў, у тым ліку грамадзяне Беларусі. Расейскія ўлады нібыта знайшлі ў тым тэракце «украінскі след».
Сцяпан Кубік belsat.eu
