Арганізацыя «BYPOL» выставіла ў супольны доступ відэазапіс, зроблены дронам-выведнікам у Мачулішчах. Дрон бесперашкодна лятаў над аэрадромам і сядзеў на «талерцы» расейскага самалёта-лакатара А-50.
Ролік працягласцю каля дзвюх хвілінаў апублікавалі на YouTube-канале «BYPOL». У аб’ектыў дрона трапілі самалёты, што базуюцца ў Мачулішчах, а таксама той самы А-50, які пазней быў атакаваны.
«Беларускія партызаны цягам двух тыдняў з дапамогаю дронаў цывільнага прызначэння, набытых у краме, вялі авіявыведку на аэрадроме Мачулішчы. Падчас адной з паспяховых аперацыяў дрон не толькі залятаў на ахоўную тэрыторыю аэрадрому, пралятаў побач з расейскім ваенным самалётам А-50У, але і садзіўся на ягоную радыёлакацыйную станцыю, «талерку», – гаворыцца з паведамленні «BYPOL».
У арганізацыі адзначылі, што «на распрацоўванне і вытворчасць сродкаў барацьбы з дронамі выдаткавалі з бюджэту дзясяткі мільёнаў рублёў», аднак у патрэбны момант гэтыя сродкі не дапамаглі.
Пра дыверсію ў Мачулішчах стала вядома ў нядзелю, 26 лютага. Адказнасць за яе ўзяў «BYPOL», у арганізацыі заявілі, што беларускія партызаны з дапамогаю дронаў падарвалі расейскі самалёт А-50 і паспяхова выехалі за мяжу.
На спадарожнікавым здымку, зробленым, як сцвярджаецца, пасля здарэння, відаць пашкоджанні на фюзеляжы: выглядае, што ў самалёта месцамі нібыта аблупілася фарба. Кіраўнік «BYPOL» Аляксандр Азараў сцвярджае, што ў А-50 знядзеілі абсталяванне, неабходнае для кіравання абстрэламі. Незалежнага пацвярджэння гэтай інфармацыі няма.
Напярэдадні дзяржаўныя крыніцы распаўсюдзілі відэа, імаверна, таго самага самалёта, які ў цемры перасоўваўся на нейкім аэрадроме. Ракурс не дазваляе зрабіць высновы пра стан борта, невядома, калі і дзе відэа было зробленае.
Сёння, паводле звестак «Беларускага Гаюна», А-50 вылецеў з Мачулішчаў у Расею, у Таганрог, дзе ёсць авіязавод. Там рамантуюць агрэгаты акурат такіх самалётаў-лакатараў.
Сяргей Крот belsat.eu
