«Гэта былі беларусы, яны ўжо за мяжою». Расейскі самалёт у Мачулішчах атакавалі з дронаў
Кіраўнік аб’яднання «ByPol» Аляксандр Азараў паведаміў «Белсату», што расейскі самалёт А-50 у Мачулішчах атакавалі з паветра. Напад з дапамогай дронаў учынілі ўдзельнікі плана «Перамога», яны цяпер у бяспецы.
Да атакі на самалёт далёкага радыёлакацыйнага выяўлення і кіравання А-50 Паветрана-касмічных сілаў Расеі прычыніліся беларускія партызаны – удзельнікі плана «Перамога». Пра гэта «Белсату» паведаміў кіраўнік аб’яднання «ByPol» Аляксандр Азараў:
«Гэта былі дроны. Удзельнікі аперацыі – беларусы, удзельнікі плана «Перамога», яны цяпер ужо ў бяспецы за межамі краіны. Усе выехалі, хай цяпер шукаюць вецер у полі».
Азараў паведаміў, што аперацыю рыхтавалі некалькі месяцаў, і выказаў меркаванне, што цяперашнія ўлады ў Менску не назавуць гэтую атаку нагодай для наўпроставага ўдзелу беларускай арміі ў вайне ва Украіне:
«Яны могуць сказаць, што заўгодна, але я не думаю, што цяпер Лукашэнку выгодна нападаць на Украіну. Сапраўды, ён можа выкарыстаць гэтую акцыю, каб зваліць усё на ўкраінцаў, але цяпер у Беларусі няма дастатковай колькасці расейскіх войскаў для таго, каб з тэрыторыі Беларусі можна было б здзейсніць новы напад на Украіну».
Самалёт А-50 атрымаў сур’ёзныя пашкоджанні, і, паводле ацэнак «ByPol», «дакладна ўжо нікуды не паляціць».
Некалькі выбухаў прагрымелі на аэрадроме ў Мачулішчах сёння раніцай. Былі паведамленні і пра трэці выбух уначы.
Пасля здарэння міліцыянты ўчынілі на дарогах праверкі аўтамабіляў, супрацоўнікі ДАІ зазіраюць у багажнік, глядзяць дакументы, часам – нават мабільныя тэлефоны. У бок аэрадрому рушылі машыны вайскоўцаў, СК, хуткай дапамогі. У раёне дзяжураць сілавікі ў бронекамізэльках і са зброяй.
Паводле звестак Telegram-каналу «МотолькоПомоги», «АМАП у поўным рыштунку пачаў хадзіць па кватэрах», некага шукаюць. У сілавікоў нібыта ёсць нейкі «бчб-спіс».
«ByPol», тым часам, папярэджвае, што сілавікі пачалі адсочваць публікацыі і каментары ў сацсетках пра здарэнне ў Мачулішчах. Беларусаў заклікаюць быць асцярожнымі і не падстаўляцца.
Самалёты далёкага радыёлакацыйнага выяўлення і кіравання А-50 выкарыстоўваць для навядзення на цэлі, кіравання знішчальнікамі. Цяпер яны задзейнічаныя ў вайне ва Украіне.
Беларускія і расейскія міністэрствы звесткі пра атаку на самалёт пакуль ніяк не пракаментавалі.
Сяргей Крот belsat.eu
