Вярхоўны суд не задаволіў апеляцыю асуджанага журналіста Алеся Любенчука. Разгляд справы адбыўся яшчэ 24 студзеня, але вядома пра гэта стала толькі цяпер. Алеся Любянчука неўзабаве перавядуць у калонію, піша БАЖ.
Журналіста Алеся Любянчука летась пакаралі 3 гадамі зняволення за нібыта «ўдзел у экстрэмісцкім фармаванні». Палітвязень склаў на прысуд апеляцыю ў Вярхоўны суд. Але суд адхіліў зварот і пакінуў ранейшы прысуд. Неўзабаве журналіста могуць этапаваць у калонію, паводле некаторых звестак, гэта будзе папраўчая ўстанова №15 у Магілёве на Слаўгарадскай шашы, 183.
Алеся Любенчука затрымалі 26 траўня летась. Яго забралі з вёскі Крывічы Івейскага раёну, дзе ён жыў апошнім часам.
У 2020 годзе Любенчука некалькі разоў затрымлівалі за выкананне прафесійных абавязкаў, і ён адбываў арышт у турме ў Баранавічах. Пасля падзеяў 2020 Алесь Любянчук займаўся турызмам і аднаўленнем гістарычна-культурнай спадчыны свайго раёну.
Праваабаронцы прызналі Алеся Любянчука палітвязнем.
Алена Аляксандрава belsat.eu
