Інфляцыя, якая рэзка замарудзілася ў трэцім квартале, у кастрычніку паскорылася амаль у два разы.
У прэзентаваным аналітычнай камандай Еўразійскага банку развіцця аглядзе эканомік ЕАЭС зазначаецца, што інфляцыя ў Беларусі ў гадавым выражэнні рэзка павысілася.
«Рост спажывецкіх цэнаў у кастрычніку склаў 3,7 % год да года ў параўнанні з 2,0 % у верасні і 2,3 % у жніўні», – сказана ў традыцыйным макраэканамічным аглядзе ЕАБР.
Эканамісты лічаць, што галоўнаю прычынаю рэзкага паскарэння росту цэнаў стаў леташні старт барацьбы з імі.
Нагадаем, што ў кастрычніку 2022-га ўлады Беларусі заняліся барацьбою з ростам цэнаў, які рэзка паскорыўся, перш за ўсё на харчы.
«Ключавым фактарам стаў выхад з разліку дэфляцыі ў 1 %, зафіксаванай у кастрычніку мінулага года», – упэўненыя аналітыкі Еўразійскага банку развіцця.
Пры гэтым у штотыднёвым эканамічным аглядзе адзначаецца, што больш за ўсё ў кастрычніку падскочылі цэны на прадукты харчавання.
«У гэтым годзе самым прыкметным было паскарэнне росту цэнаў на харчовыя тавары, да 4,3 % год да года ў кастрычніку (пры 2,4 % г/г у верасні), што сфармавала 1,8 % прыросту паказніку гадавой інфляцыі», – сказана ў аглядзе эканомік ЕАЭС.
Пры гэтым рост цэнаў на прадукты харчавання быў ледзь не ўдвая ніжэйшы, чым рост цэнаў на паслугі.
«Таксама істотны ўклад у прырост інфляцыі (1,9 %) фармуе рост цэнаў на паслугі, які склаў 7,9 % год да года ў кастрычніку (з 7,6 % г/г у верасні)», – сказана ў макраэканамічным аглядзе ЕАБР.
Але ёсць і прыемная навіна: замарудзілася павышэнне цэнаў на нехарчовыя тавары, у кастрычніку яны падаражэлі на 0,3 % у гадавым вылічэнні, пры інфляцыі 2,3 % г/г у верасні.
СП, belsat.eu