14 снежня 2023 года ў вайсковай частцы 3310 у Менску прайшлі вучэнні новага падраздзялення спецназу ўнутраных войскаў «Тарнада». Яно было створанае для «барацьбы з дыверсійна-разведвальнымі групамі і незаконнымі ўзброенымі фарміраваннямі». На відэа з вучэнняў можна заўважыць, што ў вайсковай частцы побач з дзяржсцягам лунае сцяг ПВК Вагнэра.
Прапагандыст Канстанцін Прыдыбайла распавёў, што сцяг баевікоў атрымаў там пастаянную прапіску, паколькі найміты, якія могуць мець дачыненне да ваенных злачынстваў ва Украіне і іншых краінах, увайшлі ў склад спецназа «Тарнада», звяртае ўвагу тэлеграм-канал Беларусь галаўнога мозгу.
Нагадаем, паводле беларускага закону служыць у органах унутраных справаў могуць толькі грамадзяне. Аб’яднанне «BELPOL» даведалася, што ў Беларусі плануюць дазволіць замежным грамадзянам кантрактную службу ва ўзброеных сілах і ўнутраных войсках. Як паведамілі «Белсату» ў арганізацыі, гэта ініцыятыва дзяржаўнага сакратарыяту Савету бяспекі. Паводле неафіцыйных звестак, пасля 6 гадоў службы замежнікам будуць даваць беларускае грамадзянства.
СП, belsat.eu
