Беларускі памежны камітэт: на мяжы з Польшчай знайшлі ўцекача ў непрытомным стане і амаль без вопраткі
Памежны камітэт Беларусі сцвярджае, што 16 кастрычніка на мяжы з Польшчай памежны атрад знайшоў групу ўцекачоў. Адзін з мігрантаў быў практычна без вопраткі, змерзлы, змоклы і без прытомнасці.
Беларускія памежнікі запэўніваюць, што ўцекачоў гвалтам выгналі з польскай тэрыторыі, хоць мігранты прасілі не кідаць іх і аказаць дапамогу. Ратавалі мужчыну без прытомнасці ўжо нібыта беларускія медыкі. Памежны камітэт размясціў у сваім афіцыйным тэлеграм-канале і відэа здарэння.
У сваю чаргу памежная ахова Польшчы апублікавала відэа, на якім натоўп людзей нешта крычыць каля калючага дроту. Паводле польскіх памежнікаў, 15 кастрычніка 70 мігрантаў спрабавалі перайсці беларуска-польскую мяжу ў Мельніку на Падляшшы.
Два дні таму, 14 кастрычніка, польскія памежнікі паведамілі, што ў памежнай зоне, на тэрыторыі надзвычайнага становішча знайшлі цела 24-гадовага сірыйца. Пазней устанавілі, што з сярэдзіны верасня памерлы мужчына быў у Беларусі, пра што сведчаць знойдзеныя пры ім дакументы. Цяпер пракуратура займаецца расследаваннем прычыны смерці сірыйца.
Як паведамляе памежная служба Польшчы, цягам 15 кастрычніка было зафіксавана 592 спробы незаконна перасекчы польскую мяжу з боку Беларусі.
Адзін грамадзянін Іраку быў затрыманы. Астатнія спробы перасекчы мяжу памежнікі перадухілілі.
Ад пачатку года было зафіксавана больш за 20 тысяч спробаў незаконна перасечны польскую мяжу з боку Беларусі. У міграцыйных цэнтрах Польшчы цяпер каля 1650 чалавек. Каля 5 % мігрантаў паспяхова пераходзяць мяжу нелегальна і дабіраюцца да Нямеччыны, сцвярджаюць у Службе памежнай аховы Польшчы.
Таксама пачынаючы са жніўня зафіксаваныя некалькі выпадкаў смерцяў мігрантаў на мяжы як з беларускага, так і з польскага бакоў.
ГГ, belsat.eu
