Праваабарончы цэнтр «Вясна» апублікаваў PDF-версію кнігі «Я выходжу» са здымкамі плакатаў беларускага пратэсту 2020 года. Праваабаронцы заклікаюць беларусаў праверыць, ці не трапілі яны на гэтыя здымкі.
Вясной 2021 года была выдадзеная кніга «Я выходжу», прысвечаная плакатам беларускага пратэсту. У ёй сабралі больш як 350 здымкаў. Летам таго года Святлана Ціханоўская перадала экзэмпляр кнігі ў бібліятэку Кангрэсу ЗША.
На здымках у кнізе нямала твараў пратэстоўцаў – на момант выдання яшчэ не было масавых затрыманняў праз фота з пратэстаў, здымкі выкарыстоўвалі часцей як «доказ віны» ўжо затрыманых. Пазней сілавікі сталі мэтанакіравана выяўляць пратэстоўцаў па фота з адкрытых крыніцаў – не выключана, што з ужываннем сістэмы распазнавання твараў.
22 снежня ўпершыню фота з кнігі «Я выходжу» ўжылі як галоўны доказ удзелу ў пратэстах на судзе: Дар’ю і Міхаіла Суднікаў абвінавацілі ў перакрыцці дарог на адным з пратэставых маршаў у 2020 годзе – арт. 342 КК («Актыўны ўдзел у дзеяннях, якія груба парушаюць грамадскі парадак»). Суддзя Міхаіл Макарэвіч прызначыў кожнаму па тры гады «хатняй хіміі».
Байцы ГУБАЗіК пазней пацвердзілі на сваім Telegram-канале, што выкарыстоўваюць электронную версію кнігі для выяўлення пратэстоўцаў, і заявілі, што фота з кнігі нібыта сталі доказамі ў крымінальных справах супраць 50 чалавек (ці гэта праўда, невядома).
Праваабаронцы заклікалі людзей у Беларусі праверыць, ці не трапілі яны на фота ў кнізе, і калі трапілі, тэрмінова паклапаціцца пра сваю бяспеку.
Алесь Наваборскі belsat.eu