Прэзідэнт Літоўскай Рэспублікі Гітанас Наўседа пракаментаваў расейскую палітыку на акупаваных украінскіх тэрыторыях. Палітык адзначыў, што расейскія паводзіны цалкам нагадваюць сталінскія дэпартацыі, паведамляе Delfi.lt.
Сёння ў Літве – Дзень смутку і надзеі. Менавіта 14 чэрвеня 1940 года савецкія войскі акупавалі тэрыторыю Літоўскай Рэспублікі.
«Сёння больш за мільён украінцаў, рассеяных агрэсарам – Расеяй, праходзяць трагічны шлях, які сімвалізуе 14 чэрвеня. Колькі з іх вернецца на радзіму? Хто абароніць і верне ва Украіну сіротаў і беспрытульнікаў, да якіх ужо цягнуцца акрываўленыя рукі?» – сказаў Наўседа на памятнай урачыстасці.
Пасля пачатку савецкай акупацыі пачаліся масавыя дэпартацыі літоўцаў у глыб Савецкага Саюзу. Паводле Цэнтру вывучэння генацыду і супраціву жыхароў Літвы, у чэрвені 1941-га каля 18 тысячаў чалавек у Літве былі загнаныя ў вагоны для перавозу жывёлы і вывезеныя з радзімы.
Афіцыйны Кіеў заяўляе, што Расея паводзіць сябе аналагічна ва Украіне, адкуль людзей гвалтам дэпартуюць у Расею.
«Мы не можам мірыцца з перавагаю гвалту і хлусні. Таму сёння, на знак памяці пра ахвяраў масавых дэпартацыяў у Літве, кожны з нас нанова адкрые ў сабе дух змагароў. Няхай усіх нас аб’яднае рашучасць шанаваць свабоду і супрацьстаяць несправядлівасці», – сказаў Наўседа.
Нагадаем, што міністр у пытаннях рэінтэграцыі часова акупаваных тэрыторыяў Ірына Вэрэшчук, заявіла пра некалькі дзясяткаў тысяч чалавек, якіх гвалтам вывезлі на тэрыторыю РФ. Сярод іх асобна вылучылі дзяцей-сіротаў, якім, паводле ўкраінскіх уладаў, збіраюцца выдаваць расейскія пашпарты.
Раман Лугоўскі belsat.eu
