Канстытуцыйны суд ухваліў перанос мясцовых выбараў, бо гэта выгадна

Тое, што ў Канстытуцыі запісана пра чатыры гады паўнамоцтваў, праігнаравалі.

«Маўклівы пратэст». Менск, 2011 год. Фота: svaboda.org

На партале Pravo.by 12 кастрычніка апублікавалі рашэнне Канстытуцыйнага суду Беларусі аб ухваленні закону «Аб зменах Канстытуцыі», які прадугледжвае перанос мясцовых выбараў на паўтара года – у адзін дзень з наступнымі выбарамі ў Палату прадстаўнікоў.

Мясцовыя выбары меліся адбыцца не пазней за 18 студзеня 2022 года. Парламенцкія, да якіх цяпер перанеслі і мясцовыя, мусяць прайсці не пазней за 5 лістапада 2023 года.

Правядзенне мясцовых і парламенцкіх выбараў у адзін дзень, адзначылі ў рашэнні Канстытуцыйнага суду, «канстытуцыйна мэтазгодна, паколькі спрыяе скарачэнню арганізацыйных і фінансавых выдаткаў на правядзенне выбараў, стварэнню дадатковых выгодаў для выбарнікаў і ўмоваў для больш якаснай працы выбарчых камісіяў усіх узроўняў».

Перанос мясцовых выбараў – каму гэта выгадна і навошта?

Ніякіх парушэнняў прававых гарантыяў канстытуцыйных правоў Беларусаў і прынцыпаў выбарчай сістэмы, лічыць Канстытуцыйны суд. Адзначаюць, што Канстытуцыя не забараняе працягваць паўнамоцтвы дэпутатаў мясцовых саветаў.

У рашэнні згадваюць артыкул 118 Канстытуцыі, у якім напісана: «Мясцовыя Саветы дэпутатаў выбіраюцца грамадзянамі адпаведных адміністратыўна-тэрытарыяльных адзінак тэрмінам на 4 гады». Працяг паўнамоцтваў, лічыць Канстытуцыйны суд, «выкліканае аб’ектыўнай неабходнасцю, якая ўзнікла ў сувязі з усталяваннем адзінага дня галасавання».

Некаторыя раздзелы Канстытуцыі (І, ІІ, ІV, VІІІ) можна мяняць толькі шляхам рэферэндуму. Раздзел, у якім артыкулы пра мясцовае кіраванне, да такіх не адносіцца.

Забарона на публічную палітыку. Што будзе з выбарамі ў Беларусі?

АА belsat.eu

Падпісвайся на telegram Белсату

Hавiны