Радыёжурналіста прызналі вінаватым у паклёпе на пагранічнікаў, якіх ён параўнаў з эсэсаўцамі, перадае агенцтва PAP. Гаворка ідзе пра афіцэраў, якія ахоўвалі мяжу з Беларуссю ў разгар міграцыйнага крызісу.
Суд у Сакулцы на Падляшшы прызнаў журналіста радыё TOK FM вінаватым у паклёпе за параўнанне афіцэраў Памежнай службы з эсэсаўцамі. У разгар міграцыйнага крызісу на мяжы з Беларуссю ў 2021 годзе Пётр Масьляк напісаў у Twitter:
«Інакш не магу назваць, памежнікі, якія забараняюць падачу вады і пускаюць да бежанцаў дактароў, могуць начапіць на сябе нашыўкі СС. Яны таксама выконвалі загады. І калі вам скажуць страляць у бежанцаў, вы таксама будзеце выконваць загад?»
У пракуратуру на журналіста паскардзіўся кіраўнік міністэрства ўнутраных справаў і адміністрацыі Мар’юш Каміньскі. Абвінавачванні Масьляку былі выстаўленыя ў снежні 2021-га. У пракуратуры тады казалі, што выказванне журналіста «магло прывесці да страты даверу да Памежнай службы і прынізіць яе ў вачах грамадскасці».
Пацярпелымі ў справе былі 200 памежнікаў.
У выніку суд прызнаў Масьляка вінаватым і ўмоўна спыніў справу на адзін год, а таксама абавязаў яго сплаціць 3 тысячы злотых (каля 700 долараў) у адмысловы фонд дапамогі ахвярам злачынстваў.
Журналіст ужо паабяцаў абскардзіць гэтую пастанову, бо віны не прызнае; пракуратура яшчэ вывучыць пісьмовае абгрунтаванне суда і потым вызначыцца, ці падаваць апеляцыю.
Сяргей Крот belsat.eu