Жыхары Гомля на ўмовах ананімнасці пацвердзілі незалежным журналістам моцныя выбухі над горадам уночы 13 лютага. Але ўлады робяць выгляд, што нічога не адбылося.
Сяргей, які жыве ў самым цэнтры Гомля, расказаў радыё «Свабода», што ўначы каля 00:30 чуў два магутныя выбухі, якія прагучалі адзін за другім. На яго думку, выбухі былі звязаныя з вайсковымі беспілотнікамі.
,,«Яны недзе тут упалі, і не так далёка ад цэнтру, калі ўлічваць гучнасць падзення», – сказаў ён.
Жыхарка Гомля Святлана заявіла, што ўначы прачнулася ад гукаў выбуху. А ў аўтамабілях, прыпаркаваных ля ейнага дому, спрацавала сігналізацыя.
У Гомельскім гарадскім аддзеле надзвычайных сітуацыяў журналісту, які патэлефанаваў туды як занепакоены грамадзянін, расказалі, што ліквідацыяй наступстваў падзення рэшткаў невядомага аб’екта на горад не займаліся, «не выязджалі, не тушылі нічога» – «усё ціха і спакойна». «Усё нармальна, усё штатна» было і ў гарадскім вайсковым камісарыяце.
Між тым нават беларускія праваенныя каналы пацвярджалі выбухі. «Сёння ў раёне паловы на першую ночы над Гомлем сістэмамі СПА УС РБ збіты «транзітны госць«. У кадры падаюць часткі знішчанага аб’екту», – паведаміў тэлеграм-канал «Белорусский силовик».
Не толькі Беларусь
Выбухі над Гомлем чулі падчас таго, як расейскія беспілотнікі атакавалі суседнюю Украіну. Паводле Паветраных сілаў ЗСУ, краіну атакавалі агулам 140 дронаў. Станам на 09:00 паводле мясцовага часу было пацверджанае збіццё 85 ударных БПЛА ў Харкаўскай, Палтаўскай, Сумскай, Чаркаскай, Чарнігаўскай, Кіраваградскай, Днепрапятроўскай, Мікалаеўскай, Херсонскай і Адэскай вобласцях. 52 беспілотнікі былі лакацыйна страчаныя. Ад удару пацярпелі Адэская і Харкаўская вобласці.
Некаторыя з дронаў заляцелі таксама ў суседнюю з Украінай Малдову. Гэтак, адзін беспілотнік упаў на поле недалёка ад вёскі Чумай Тараклійскага раёну, яшчэ адзін узарваўся на полі паміж горадам Чадыр-Лунга і сялом Валя-Пяржой. Таксама абломкі БПЛА былі знойдзеныя ў прыгараднай зоне гораду Тараклія, за два кіламетры ад раённай больніцы, паведаміў Генеральны інспектарат паліцыі Малдовы.
МЗС Малдовы рашуча асудзіла атакі расійскіх дронаў, якія парушылі паветраную прастору краіны. У МЗС выкліканы пасол Расеі ў Кішынэве.
,,«Вайна Расеі супраць Украіны зноў закранула Малдову. Дроны «Шагэд» парушылі нашу паветраную прастору, два з іх узарваліся на нашай тэрыторыі, падвергнуўшы небяспецы жыцці малдаванаў. Расея не паважае межы, атакуе мірных жыхароў, сее тэрор. Яе вайна супраць Украіны – злачынная. Пакіньце нас, мірныя народы, у спакоі», – заявіла прэзідэнтка Малдовы Мая Санду.
Адсутнасць мірнага неба
На Гомельшчыне перыядычна здараюцца інцыдэнты, звязаныя з вайной у суседняй Украіне. Гэтак, у ноч на 5 верасня 2024 года ў ваколіцах Гомля ВПС Беларусі знішчылі два расейскія дроны, падзенне абломкаў выклікала пажар на гарадскім складзе. 3 кастрычніка дрон упаў у Калінкавічах. Жанчыну, камера на доме якой зафіксавала яго падзенне, затрымалі сілавікі. Над Ельскім раёнам беспілотнік быў збіты ўначы 20 кастрычніка.
У ноч з 7 на 8 студзеня 2025 годажыхары Навабеліцкага раёну Гомля і пасёлку Чонкі позняй ноччу пачулі гук моцнага выбуху. Паводле відавочцы, «бабах моцны быў з боку лесу на поўдзень ад Гомля». Таксама паступіла непацверджаная інфармацыя пра моцны выбух у ваколіцах вайсковага аэрадрому «Зябраўка», што прагучаў днём раней. А ў ноч з 27 на 28 студзеня паведамлялася пра збіццё беспілотніка ў Мазырскім раёне. Яшчэ восем дронаў тады заляцелі ў Беларусь.
Уночы з 8 на 9 лютага выбухі зноў раздаліся над Гомельскім і Мазырскім раёнамі. 10 лютага заяўлялася, што дрон упаў у цэнтры Хойнікаў. Уначы 13 лютага над Беларуссю ў чарговы раз быў збіты дрон. Відэа гэтага з’явілася ў сацыяльных сетках. Але чыноўнікі пажадалі гамельчукам добрай ночы і параілі «не разводзіць панікі».
Якуб Хруст belsat.eu
