Аналену Бэрбак, якая раней узначальвала Міністэрства замежных справаў Нямеччыны, абралі старшынёю Генеральнай асамблеі Арганізацыі Аб’яднаных Нацыяў.
Абранне адбылося сёння ў другой палове дня: за ейную кандыдатуру прагаласавалі 167 краінаў, што сведчыць пра шырокае падтрыманне сярод удзельнікаў ААН.
Пры гэтым Бэрбак была адзінаю прэтэндэнткаю на гэтую пасаду. У сваёй першай прамове пасля абрання яна падзякавала прадстаўнікам краінаў за давер і падкрэсліла, што імкнецца быць «сумленным пасярэднікам» у працы асамблеі.
Цырымонію інаўгурацыі новай кіраўніцы Генеральнай асамблеі прызначылі на 9 верасня 2025 года, напярэдадні агульных дэбатаў з удзелам кіраўнікоў дзяржаваў і ўрадаў краінаў – сябраў ААН.
На гэтай пасадзе Бэрбак будзе старшыняваць на пасяджэннях, арганізоўваць працу асамблеі, сачыць за выкананнем працэдураў і рэпрэзентаваць арганізацыю на міжнародным узроўні. Гэты пост мае прадстаўнічы і каардынацыйны характар і не прадугледжвае прыняцця палітычных пастановаў.
Нагадаем, што падчас сваёй працы на чале МЗС Нямеччыны Бэрбак паслядоўна крытыкавала расейскай палітыку і выступала за жорсткі курс у дачыненні Крамля. З пачатку поўнамаштабнай агрэсіі Расеі супраць Украіны яна неаднаразова наведвала Кіеў з візітамі.
Раман Шавель belsat.eu
