Гомельская вобласць была атакаваная расейскімі беспілотнікамі ўночы з 8 на 9 лютага, выбухі раздаліся над Гомельскім і Мазырскім раёнамі. Пра гэта паведамляюць мясцовыя незалежныя медыі.
Як піша «Флагшток», на поўдні Мазырскага раёну выбух зафіксаваны прыкладна ў 02:07. Перад тым украінскі маніторынгавы канал «Ринда моніторить» адзначаў, што каля 01:54 дрон перасек мяжу Беларусі і ляцеў у напрамку Нароўлі. Ягоны сігнал быў страчаны недалёка ад пасёлка Барбараў, што за 8 кіламетраў ад Мазырскага НПЗ.
У Гомлі было чуваць два моцныя глухія выбухі з інтэрвалам 15-20 секунд у 03:26. На поўдзень ад Гомля зафіксаванае ўжыванне сілаў СПА па беспілотніках. Прычынай выбухаў маглі стаць БПЛА, якія парамі заляцелі ў Беларусь (у 00:46 дроны заляцелі з боку Рэпак, у 01:34 з боку Славуціча). Ужыванне авіяцыі беларускім бокам не фіксавалася.
Выбухам папярэднічаў пачатак масіраванай атакі расейскімі ўдарнымі БПЛА тэрыторыі Украіны. У Паветраных сілах ЗСУ паведамілі, што расейскія войскі атакавалі ўкраінскую тэрыторыю з дапамогай 151 беспілотнікаў.
Як заяўляецца, станам 09:00 пацверджанае збіццё 70 ударных БПЛА ў Кіеўскай, Харкаўскай, Палтаўскай, Сумскай, Чаркаскай, Чарнігаўскай, Кіраваградскай, Вінніцкай, Жытомірскай, Ровенскай, Валынскай, Мікалаеўскай, Херсонскай і Адэскай вобласцях. 74 беспілотніка былі лакацыйна страчаныя. У выніку атакі пацярпелі Кіеўская, Сумская, Днепрапятроўская, Харкаўская, Жытомірская і Валынская вобласці.
Адсутнасць мірнага неба
На Гомельшчыне перыядычна здараюцца інцыдэнты, звязаныя з вайной у суседняй Украіне. Гэтак, у ноч на 5 верасня 2024 года ў ваколіцах Гомля ВПС Беларусі знішчылі два расейскія дроны, падзенне абломкаў выклікала пажар на гарадскім складзе. 3 кастрычніка дрон упаў у Калінкавічах. Жанчыну, камера на доме якой зафіксавала яго падзенне, затрымалі сілавікі. Над Ельскім раёнам беспілотнік быў збіты ўначы 20 кастрычніка.
У ноч з 7 на 8 студзеня 2025 годажыхары Навабеліцкага раёну Гомля і пасёлку Чонкі позняй ноччу пачулі гук моцнага выбуху. Паводле відавочцы, «бабах моцны быў з боку лесу на поўдзень ад Гомля». Таксама паступіла непацверджаная інфармацыя пра моцны выбух у ваколіцах вайсковага аэрадрому «Зябраўка», што прагучаў днём раней. А ў ноч з 27 на 28 студзеня паведамлялася пра збіццё беспілотніка ў Мазырскім раёне. Яшчэ восем дронаў тады заляцелі ў Беларусь.
Якуб Хруст belsat.eu
