Расейскае Міністэрства абароны паведамляе пра амаль 300 беспілотнікаў, збітых над тэрыторыяй РФ мінулаю ноччу. Вядома, што дзясяткі з іх даляцелі да Падмаскоўя. А прэзідэнт Украіны абяцае Расеі люстэркавы адказ на іхныя атакі.
У Міністэрстве абароны РФ заявілі, што з 21:00 мясцовага часу 27 траўня да 7:00 28 траўня збілі і перахапілі 296 украінскіх беспілотнікаў самалётнага тыпу над тэрыторыямі Маскоўскага рэгіёну, Бранскай, Белгародскай, Уладзімірскай, Варонежскай, Іванаўскай, Калужскай, Курскай, Арлоўскай, Разанскай, Смаленскай, Цвярской, Тульскай вобласцяў.
У Маскоўскай вобласці за ноч збілі 42 беспілотнікі, пашкоджаныя тры жылыя дамы. Паводле губернатара Андрэя Вараб'ёва, сілы СПА «адпрацавалі па цэлях» у 12 муніцыпальных утварэннях рэгіёну. У выніку атакі пашкоджаныя тры жылыя дамы ў Чэхаве. Ніхто з жыхароў не пацярпеў, перадае «Медуза».
У сваю чаргу мэр Масквы Сяргей Сабянін на працягу ночы паведамляў пра збітыя украінскія беспілотнікі, якія ляцелі на сталіцу Расеі. Агулам, паводле яго, знішчаныя 33 дроны. Пад атаку беспілотнікаў трапіў, у прыватнасці, Зеленаград. «Baza» пісала, што пасля падзення абломкаў дрона там згарэў аўтамабіль каля тэхнапарку «Элма».
У падмаскоўнай Дубне, як перадае «Astra», БПЛА атакавалі прадпрыемства для распрацоўвання беспілотнікаў «Кронштадт».
Паводле «Mash», у Туле чулі гукі беспілотнікаў і прынамсі тры выбухі. Інфармацыі пра якія-небудзь наступствы на зямлі няма. Губернатар Тульскай вобласці Дзмітрый Міляеў заяўляў, што ў вобласці абвешчаная «небяспека атакі БПЛА».
У Бранскай вобласці расейскія вайскоўцы збілі не менш за 59 беспілотнікаў, паведаміў губернатар Аляксандр Багамаз. Паводле яго, у Фокінскім раёне Бранску ў выніку атакі пашкоджаныя тры шматкватэрныя жылыя дамы, гандлёвыя памяшканні і аўтамабілі, пацярпелых няма.
Цягам ночы «Росавіяцыя» цалкам закрывала неба Масквы для самалётаў. Часовыя абмежаванні на прыём і вылет уводзілі ў аэрапортах «Унукава», «Дамадзедава», «Жукоўскі» і «Шарамецьева». Праз абмежаванні авіякампаніі «Аэрофлот» і «Победа» карэктавалі расклад.
Люстэркавы адказ Украіны
Прэзідэнт Украіны Уладзімір Зяленскі ў сваім вечаровым звароце 27 траўня паабяцаў «люстэркава адказваць на ўсе расейскія пагрозы і выклікі». Паводле яго, «яны там, у Расеі, павінны выразна адчуваць наступствы ад таго, што робяць супраць Украіны».
Расейскія войскі ў ноч на 24 траўня ўчынілі масаваны абстрэл Украіны, асноўнымі цэлямі былі Кіеў і Адэса. У выніку атакі ва ўкраінскай сталіцы налічылі 15 пацярпелых. На наступную ноч Расея выпусціла амаль 300 беспілотнікаў і сем дзясяткаў ракетаў. У Кіеве пацярпелі 11 чалавек, у Кіеўскай вобласці – 16 параненых. У Жытомірскай вобласці пацярпелі 10 чалавек і загінулі трое дзяцей – 8, 12 і 17 гадоў. У Хмяльніцкай вобласці загінулі чацвёра. У Мікалаеве загінуў адзін чалавек, пацярпелі пяцёра. Агулам у выніку ўдараў загінулі 10 чалавек.
Кіраўніца дыпламатыі Еўразвязу Кая Калас заявіла ў адказ на расейскую атаку, што толькі «наймацнейшы міжнародны ціск на Расею» дазволіць спыніць вайну ва Украіне. А прэзідэнт ЗША Доналд Трамп 26 траўня напісаў, што Уладзімір Пуцін «зусім звар’яцеў». Паводле яго, той не толькі «дарма забівае мноства» вайскоўцаў, але і «ракеты і беспілотнікі скідваюцца на гарады Украіны без усялякай прычыны».
Якуб Хруст belsat.eu
