Паводле неафіцыйных звестак, уночы з 27 на 28 студзеня ў небе над беларускім Мазыром. У міліцыі кажуць, што ўсё пад кантролем.
Пра тое, што БПЛА падлятаў да беларускага Мазыра каля 00:57 паводле беларускага часу паведаміў украінскі маніторынгавы тэлеграм-канал «Ринда моніторить». Але ў наступную хвіліну ён адзначыў, што БПЛА больш не фіксуецца.
«Беларускі Гаюн» адзначае, што «Шагэд» падляцеў на адлегласць каля 6 кіламетраў да Мазыра. Авіяцыя ВПС РБ не паднімалася ў неба. Паводле яго, каля 00:55 у Мазырскім раёне быў чутны выбух. Як мяркуецца, гэта быў запуск ракеты СПА.
У міліцыі «Еўрарадыё» параілі «не турбавацца» і падкрэслілі, што «ўсё пад кантролем». Прычыны выбухаў не агучылі.
Паветраныя сілы Збройных сілаў Украіны паведамлялі пра масавую атаку расейскіх дронаў на Украіну ў ноч з 27 на 28 студзеня.
У ноч з 7 на 8 студзеня жыхары Навабеліцкага раёну Гомля і пасёлку Чонкі позняй ноччу пачулі гук моцнага выбуху. Паводле відавочцы, «бабах моцны быў з боку лесу на поўдзень ад Гомля». Таксама паступіла непацверджаная інфармацыя пра моцны выбух у ваколіцах вайсковага аэрадрому «Зябраўка», што прагучаў днём раней.
Раней таксама паведамлялася пра збітыя над Беларуссю беспілотнікі. Гэтак, у ноч на 5 верасня 2024 года ў ваколіцах Гомля ВПС Беларусі знішчылі два расейскія дроны, падзенне абломкаў выклікала пажар на гарадскім складзе. 3 кастрычніка дрон упаў у Калінкавічах. Жанчыну, камера на доме якой зафіксавала яго падзенне, затрымалі сілавікі. Над Ельскім раёнам беспілотнік быў збіты ўначы 20 кастрычніка.
Адзначым, што па словах прэзідэнта Украіны Уладзіміра Зяленскага, Аляксандр Лукашэнка ў першыя дні вайны выбачаўся за ракеты з боку Беларусі і прапанаваў таму ўдарыць па Мазырскаму нафтаперапрацоўчаму заводу ў якасці «кампенсацыі».
Якуб Хруст belsat.eu
