Уначы 13 лютага над Беларуссю ў чарговы раз быў збіты дрон. Адбылося гэта падчас масавай расейскай атакі на Украіну. Але чыноўнікі пажадалі гамельчукам добрай ночы.
Як адзначае «Флагшток», каля 00:32 над Гомлем адбылося збіццё лятальнага аб'екта. Пра падзенне абломкаў на зямлю паведамілі жыхары цэнтральнай і паўночна-ўсходняй частак Гомля.
Шум выбуху чутны быў ва ўсім горадзе і ў прыгарадах. У Гомлі ад выбухной хвалі спрацавалі сігналізацыі аўтамабіляў, гараджане адчулі вібрацыю сцен дамоў. На вуліцы адчуваўся пах гару.
У сеціве таксама з’явіліся відэа збіцця аб’екту. Адным з першых іх апублікаваў расейскі тэлеграм-канал «ВЧК-ОГПУ» (тут і тут). Расейскія тэлеграм-каналы таксама адзначаюць, што пра выбух у небе і працу СПА па дронах паведамлялі жыхары з вёскі Раманавічы пад Гомлем, а таксама гомельскага мікрараёну Волатаў.
Чыноўнікі заклікаюць не хвалявацца
У тэлеграм-канале «Говорит Гомель», які кантралюецца чыноўнікамі аблвыканкаму, з’явіўся заклік да гамельчукоў:
,,«Не разводзьце паніку і не вядзіцеся на правакацыі!!! У сеціве распаўсюджваюцца відэаролікі аб меркаваным падзенні нейкага абʼекта ў Гомлі. Для пацверджання ці абвяржэння гэтай інфармацыі неабходныя каментары афіцыйных крыніц! Усё ў парадку, супакойцеся! Дабранач!»
Флагшток адзначае, што гэта можа быць «рэакцыя спрасонку», бо афіцыйныя крыніцы пазбягаюць каментаваць здарэнні з расейскімі беспілотнікамі ў паветранай прасторы Беларусі.
Падзенне ў часе супала з масавым паветраным нападам Расеі тэрыторыі Украіны. Пад ударам у тым ліку суседняя Чарнігаўская вобласць.
Адсутнасць мірнага неба
На Гомельшчыне перыядычна здараюцца інцыдэнты, звязаныя з вайной у суседняй Украіне. Гэтак, у ноч на 5 верасня 2024 года ў ваколіцах Гомля ВПС Беларусі знішчылі два расейскія дроны, падзенне абломкаў выклікала пажар на гарадскім складзе. 3 кастрычніка дрон упаў у Калінкавічах. Жанчыну, камера на доме якой зафіксавала яго падзенне, затрымалі сілавікі. Над Ельскім раёнам беспілотнік быў збіты ўначы 20 кастрычніка.
У ноч з 7 на 8 студзеня 2025 годажыхары Навабеліцкага раёну Гомля і пасёлку Чонкі позняй ноччу пачулі гук моцнага выбуху. Паводле відавочцы, «бабах моцны быў з боку лесу на поўдзень ад Гомля». Таксама паступіла непацверджаная інфармацыя пра моцны выбух у ваколіцах вайсковага аэрадрому «Зябраўка», што прагучаў днём раней. А ў ноч з 27 на 28 студзеня паведамлялася пра збіццё беспілотніка ў Мазырскім раёне. Яшчэ восем дронаў тады заляцелі ў Беларусь.
Уночы з 8 на 9 лютага выбухі зноў раздаліся над Гомельскім і Мазырскім раёнамі. 10 лютага заяўлялася, што дрон упаў у цэнтры Хойнікаў.
Якуб Хруст belsat.eu
