Пракуратура Асіповіцкага раёну падчас правярання раскрыла выпадкі, калі з жыхароў, што цярпяць ад псіхічных хваробаў, мясцовыя органы ЖКГ бралі поўную аплату камунальных паслуг, як з незанятых у эканоміцы, апавялі ў Службе інфармацыі пракуратуры Магілёўскай вобласці.
Было вызначана, што на працягу доўгага часу некаторыя асобы, якія цярпяць ад псіхічных захворванняў, былі ў спісах працаздольных, але не занятых у эканоміцы. У выніку гэтым людзям плата за камунальныя паслугі налічвалася з поўнаю кампенсацыяй эканамічна абгрунтаваных затратаў на іх наданне.
У парадку рэагавання пракурор Асіповіцкага раёну вынес пратэсты на рашэнні райвыканкаму ў частцы неабгрунтаванага залучэння вышэй згаданай катэгорыі грамадзянаў у спісы незанятых у эканоміцы. Пасля гэтага жыхароў Асіповічаў і раёну з псіхічнымі разладамі выкраслілі са спісу дармаедаў, а органы ЖКГ абавязаныя правесці ім пераразлік камуналкі і вярнуць грошы.
Згодна з п. 5 дэкрэту Аляксандра Лукашэнкі за 2 красавіка 2015 года № 3 «Аб спрыянні занятасці насельніцтва», з 1 студзеня 2019-га працаздольныя грамадзяне, не занятыя ў эканоміцы, аплочваюць камунальныя паслугі паводле поўных тарыфаў. Гэтая захада дзеіць дасюль і датычыць беспрацоўных, у якіх ва ўласнасці ёсць нерухомасць.
Цягам апошніх гадоў улады далучаюць да дармаедаў усё новыя катэгорыі і ўводзяць для іх новыя віды адказнасці. Гэтак, калі беспрацоўны выхоўвае дзяцей, сям’ю могуць паставіць на ўлік як тую, што ў сацыяльна небяспечным становішчы.
Нядаўна да дармаедаў у Беларусі пачалі залічваць у тым ліку тых, хто застаецца за мяжою больш за 30 дзён, нават праз працу ці навучанне. Выключэнне робіцца для тых, хто едзе ў краіны ЕАЭС ці на лячэнне альбо ў камандзіроўку.
З 1 красавіка 2025 года МУС Беларусі рэалізуе «Комплекс дадатковых захадаў для прафілактычнага ўздзеяння ў дачыненні працаздольных грамадзянаў, не занятых у эканоміцы, у тым ліку асобаў, якія вядуць асацыяльны лад жыцця. У межах гэтага комплексу з беларусамі праводзяцца тлумачальныя размовы, у тым ліку аб прыняцці захадаў для працаўладкавання, як падчас штотыднёвых прыёмаў участковымі інспектарамі міліцыі, гэтак і пры наведванні паводле месца жыхарства супольна з зацікаўленымі службамі.
З сакавіка з усіх рэгіёнаў Беларусі прыходзяць паведамленні, што на размовы адносна занятасці ў эканоміцы выклікаюць у РАУСы ці міліцыя прыносіць позвы з патрабаваннем прыйсці ў цэнтр занятасці.
Марыя Міхалевіч belsat.eu
