Ракета, якая ўпала на тэрыторыю Польшчы 15 лістапада, імаверна, была выпушчаная ўкраінскімі сіламі супрацьпаветранай абароны пры адбіцці расейскіх атак. Пра гэта на брыфінгу ў Бруселі 16 лістапада заявіў генеральны сакратар NATO Енс Стольтэнбэрг.
«Учорашні выбух адбыўся, калі Расея нанесла хвалю ракетных удараў па Украіне. Расследаванне інцыдэнту працягваецца, і мы павінны чакаць яго завяршэння. Але ў нас няма ніякіх доказаў таго, што гэта была наўмысная атака. І няма ніякіх прыкмет таго, што Расея рыхтавала напад на тэрыторыю NATO», – сказаў Стольтэнбэрг.
Паводле генеральнага сакратара NATO, папярэднія звесткі сведчаць, што інцыдэнт адбыўся з прычыны выкарыстання ўкраінскай сістэмы супрацьпаветранай абароны супраць расейскіх ракетных удараў у аўторак 15 лістапада.
«Але я хачу выразна заявіць, што гэта не віна Украіны. Расея нясе поўную адказнасць, бо працягвае незаконную вайну супраць Украіны», – сказаў ён.
Раней паведамлялася, што ў Польшчы днём 15 лістапада загінулі два чалавекі. Калі Расея абстрэльвала Украіну, адна ці дзве ракеты расейскай вытворчасці ўпалі ў вёсцы блізу мяжы з Украінай. Польшча склікала Раду бяспекі вечарам 15-га і зноў склікае апоўдні 16-га, выклікала амбасадара Расеі, трымае кантакт з саюзнікамі з Паўночнаатлантычнага альянсу і з Украінай, падвысіла боегатовасць асобных войскаў.
Антон Тачняк belsat.eu
