«Белсат» падводзіць вынікі 381-х содняў поўнамаштабнай вайны, распачатай Расеяй ва Украіне. Пра галоўныя падзеі на вечар 11 сакавіка чытайце ў нашым аглядзе.
Цягам апошніх содняў вайны Збройныя сілы Украіны адбілі больш за 100 атак праціўніка на ліманскім, бахмуцкім, аўдзееўскім, мар’інскім і шахцёрскім кірунках на ўсходзе краіны. Між тым інтэнсіўнасць баявых дзеянняў істотна адрознівалася ў залежнасці ад канкрэтнага ўчастку фронту.
Паводле Генштабу ЗСУ, на ліманскім кірунку Узброеныя сілы РФ няўдала наступалі каля Граныкоўкі, Масютаўкі, Неўскага, Крэмінной, Белагораўкі, Спірнага і Фёдараўкі.
Расейскі ваенны карэспандэнт Сямён Пегаў адзначае ўкраінскую контратаку каля Чэрвонапапоўкі ў Луганскай вобласці.
Цяпер баі ідуць па ўмоўнай лініі Плашчанка – Дзіброва.
Тэлеграм-канал «Два майора» сцвярджае, што Узброеныя сілы РФ штодня прасоўваюцца на захад ад Крэмінной на 100–200 метраў.
На бахмуцкім кірунку расейцы атакавалі каля Залізнянскага, Парасковіеўкі, Дубова-Васілеўкі, Бахмуту, Багданаўкі і Іванаўскага.
Такімі дзеяннямі, паводле праекту «Deepstate», войскі РФ намагаюцца знайсці слабыя месцы ва ўкраінскай абароне. Пры гэтым асаблівая ўвага надаецца ваколіцам Дубова-Васілеўкі, Багданаўкі і Хромава (на захад ад Бахмуту).
У гэты ж час расейскія крыніцы паведамляюць, што падраздзяленні ПВК Вагнэра пераразаюць апошнюю дарогу ў Бахмут, якая ідзе праз Хромава.
У гэты ж час працягваюцца баі ў самым райцэнтры. Тут войскі РФ ціснуць з поўначы і поўдня. Таксама ёсць паведамленні, што праціўнік перайшоў раку Бахмутку і паступова прасоўваецца да цэнтру гораду.
На аўдзееўскім, мар’інскім і шахцёрскім кірунках расейцы наступалі каля Камянкі, Аўдзееўкі, Тоненькага, Севернага, Вадзянога, Первамайскага, Невельскага, Краснагораўкі, Мар’інкі і Новаміхайлаўкі.
«Deepstate» адзначае цяжкі і амаль няспынны характар баёў на ўсход ад Аўдзееўкі. Такім чынам войскі РФ намагаюцца атачыць горад, у якім ЗСУ ўдала абараняюцца на ўмацаваных пазіцыях.
У гэты ж час працягваюцца гарадскія баі ў Мар’інцы, але і тут украінскі бок стрымлівае праціўніка.
Лінія фронту ў Запарожскай, Херсонскай і Мікалаеўскай вобласцях застаецца адносна стабільнаю. Пры гэтым расейцы працягваюць абстрэльваць украінскія пазіцыі з артылерыі.
Паводле ўкраінскага камандавання, цягам апошніх содняў вайны былі знішчаныя каля 1010 расейскіх вайскоўцаў, у выніку чаго агульныя беззваротныя страты РФ дасягнулі 158 тысячаў чалавек.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйных паведамленняў удзельнікаў вайны.
ТМ belsat.eu