Прэзідэнт Украіны Уладзімір Зяленскі заявіў, што з пачатку верасня Збройныя сілы Украіны вызвалілі каля двух тысячаў квадратных кіламетраў акупаваных расейскімі войскамі тэрыторыяў краіны. Пра гэта Зяленскі заявіў 10 верасня ў вечаровым відэазвароце.
«Рух нашых воінаў у розных напрамках фронту працягваецца. На гэты час у рамках актыўных дзеянняў з пачатку верасня ўжо вызвалена каля 2 тысяч кіламетраў нашай тэрыторыі. У гэтыя дні расейская армія дэманструе найлепшае, што ўмее, – паказвае спіну. І, у рэшце рэшт, гэта добры выбар для іх, каб уцячы. Ва Украіне месца акупантам няма і не будзе», – сказаў прэзідэнт Украіны Уладзімір Зяленскі.
Асобна кіраўнік Украіны згадаў байцоў 15-га Славянскага палка Нацыянальнай гвардыі Украіны, якія вызначыліся на Харкаўскім напрамку, і воінаў 214-га асобнага стралковага батальёна, якія вызвалялі Балаклею.
У той жа час Уладзімір Зяленскі паўтарыў заклік да расейскіх вайскоўцаў, якія «не хочуць вяртацца ў РФ» ці здавацца ў палон з гарантыямі, якія прадугледжвае Жэнеўская канвенцыя.
Паводле звестак Генштабу Украіны, у апошнія дні ЗСУ вызвалілі або ўзялі пад кантроль больш за 30 населеных пунктаў, якія былі часова захопленыя расейскімі акупантамі ў Харкаўскай вобласці, у тым ліку гарады Балаклія і Куп’янск. 10 верасня стала вядома, што расейскія войскі адступілі і з Ізюму. Мінабароны Расеі назвала гэтае адступленне сваіх войскаў «перагрупаваннем для нарошчвання высілкаў на Данецкім кірунку». Поўнамаштабная вайна ва Украіне працягваецца 199 дзень.
Зміцер Міраш belsat.eu