Міжнародная асацыяцыя боксу дазволіла баксёрам з Расеі і Беларусі браць удзел у спаборніцтвах
Рада дырэктараў Міжнароднай асацыяцыі боксу (IBA) пастанавіла адмяніць раней уведзеную забарону на ўдзел у спаборніцтвах баксёрам з Расеі і Беларусі. Пастанова неадкладна набывае моц, паведамляецца на сайце асацыяцыі.
Рада дырэктараў IBA пастанавіла, што палітыка не мусіць уплываць на спорт. Таму прадстаўнікі асацыяцыі знялі раней уведзеную забарону на ўдзел у спаборніцтвах беларускіх і расейскіх баксёраў.
«IBA заклікае да міру і застаецца міратворцам у любых канфліктах. Больш за тое, IBA абавязаная забяспечваць роўнае стаўленне да спартоўцаў і афіцыйных асобаў спаборніцтваў, незалежна ад іх грамадзянства і месца жыхарства», – адзначаецца ў паведамленні асацыяцыі.
Цяпер расейскія і беларускія каманды змогуць выступіць пад сваймі сцягамі, пры атрыманні залатых медалёў падчас узнагароды пераможцаў будуць гучаць дзяржаўныя гімны.
Адметна, што афіцыйна партнёрам IBA застаецца расейскі «Газпром», а прэзідэнт асацыяцыі – грамадзянін Расеі. У складзе рады, сярод іншых, толькі тры еўрапейскія прадстаўнікі: з Грэцыі, Іспаніі і Вугоршчыны.
Алена Аляксандрава belsat.eu
