Больш за два гады рэжым Лукашэнкі працягвае масавы тэрор супраць беларусаў. «Белсат» сабраў выпадкі пераследу, пра якія сталася вядома 4 кастрычніка.
Палітзняволеную журналістку Кацярыну Андрэеву этапавалі з СІЗА № 3 у папраўчую калонію на вуліцы Антошкіна ў Гомлі. Пра гэта ў Facebook паведаміў ейны муж Ігар Ільяш.
35-гадовую жыхарку вёскі Копішча Вольгу Раманцову затрымалі за каментар у Сеціве. Прыйшлі за жанчынай адразу восем сілавікоў у поўным абмундзіраванні са зброяй і георгіеўскімі стужкамі. Праваабаронцы паведамляюць, што супраць Вольгі распачалі крымінальную справу.
У Гомлі сілавікі схапілі 45-гадовага жыхара гораду Аляксандра Стругальскага. Галоўнага інжынера заводу ААТ «Мілкавіта» затрымалі за тое, што ён нібыта «спрабаваў сарваць правядзенне рэспубліканскага рэферэндуму», а таксама дасылаў грошы ў фонд «BYSOL». Супраць мужчыны распачалі крымінальную справу паводле арт. 361-2 КК («Фінансаванне дзейнасці экстрэмісцкага фармавання»).
У Менску сілавікі затрымалі блогера-мільённіка Улада Белавусава. Блогера, у якога 2,1 млн падпісчыкаў у TіkTok, вінавацяць ва ўдзеле ў акцыях пратэсту.
У Баранавічах затрымалі «афганца» Генадзя Борыса. Прычына затрымання невядомая. Раней мужчыну аштрафавалі за распаўсюд «экстрэмісцкіх матэрыялаў».
Былы дэпутат Вярхоўнага Савету Павел Знавец затрыманы і цяпер на Акрэсціна. Палітыка абвінавачваюць ва ўдзеле ў акцыях пратэсту ў 2020 годзе.
Алена Аляксандрава belsat.eu