Беларускі кубінец, якога дэпартавалі за пратэсты, выйграў суд з Дэпартаментам міграцыі Літвы
Кубінец Рабэрта Вальдэс Касануэва, якога дэпартавалі з Беларусі за пратэсты ў 2020 годзе, выйграў суд з Дэпартаментам міграцыі Літвы, паведамляе фонд BYSOL.
Рабэрта Касануэва затрымалі падчас беларускіх пратэстаў і год трымалі на Акрэсціна ў чаканні дэпартацыі на Кубу праз Расію. Пасля гэтага ён прыехаў па гуманітарнай візе ў Літву, дзе Дэпартамент міграцыі праз год вырашыў, што на радзіме яму нічога не пагражае.
Тады Касануэва вырашыў абскарджваць гэтае рашэнне ў судзе і 26 верасня стала вядома, што літоўскі суд прыняў бок замежніка. Сабраць грошы на адваката ў Еўропе яму дапамаглі людзі пры дапамозе фонда BYSOL.
«Адчуванне, што жыццё працягваецца, падарожжа трывае. Засталося дачакацца ўсіх патрэбных дакументаў. Дзякуй вялізарны ўсім за падтрымку і дапамогу, сябры! Я шчаслівы, што вы ў мяне ёсць, усе вы! […] Перавага дэмакратыі ў тым, што калі ты нязгодны, то магчыма аспрэчыць рашэнне Дэпартаменту міграцыі ў судзе. Парада для ўсіх беларусаў – карыстайцеся перавагамі дэмакратыі і ідзіце ў суд», – кажа Рабэрта Касануэва.
Нагадаем, што 55-гадовы кубінец пражыў у Беларусі 30 гадоў, мае сям’ю і трох дзяцей. Яго затрымалі на маршы 8 лістапада 2020 года. Пазней яму прысудзілі 15 содняў, з якіх ён не выйшаў. Больш за год мужчына правёў на Акрэсціна ў чаканні дэпартацыі. 10 лістапада яго дэпартавалі на Кубу, а адтуль ён прыехаў у Літву.
Алена Рувіна belsat.eu
