Аляксандр Лукашэнка даручыў правесці комплексную праверку сістэмы аховы здароўя Беларусі. Для гэтага створана міжведамасная рабочая група. Першы даклад павінен быць гатовы да 31 сакавіка. Аб гэтым паведамляе блізкі да прэс-службы тэлеграм-канал «Пул Первого».
Хворы на кавід ў шпіталі. Выява мае ілюстрацыйнае значэнне. Фота Мінздароўя Беларусі / Telegram
Міжведамасная група створана распараджэннем Аляксандра Лукашэнкі 20 студзеня. Яна павінна праверыць «эфектыўнасць функцыянавання сістэмы аховы здароўя ў частцы аказання медычнай дапамогі насельніцтву». У групу ўключаны медыкі, якія валодаюць неабходнай кваліфікацыяй і дастатковым практычным вопытам. Паведамляецца, што пры неабходнасці да работы групы будуць прыцягвацца кіраўнікі і спецыялісты іншых дзяржаўных органаў і арганізацыяў і «іншыя асобы, якія маюць адпаведную кваліфікацыю і практычны вопыт».
Да 31 сакавіка група павінна прадставіць першы даклад аб выніках праверкі і прапановы па вырашэнню выяўленых праблемных пытанняў.
Раней паведамлялася, што ў Беларусі колькасць вакансіяў для медычных работнікаў перавысіла 8 000, а ведамства не перастаюць страсаць карупцыйныя скандалы. Так, напрыканцы снежня генеральная пракуратура аб’явіла, што раскрыла схему схаванага подкупу медыкаў замежнымі фармацэўтычнымі кампаніямі з мэтай прасоўвання сваіх тавараў на беларускім рынку. Па крымінальнай справе праходзіць 62 медыкі, іх вінавацяць у атрыманні незаконнай узнагароды на Br 400 000. У адказ міністр аховы здароўя Беларусі Дзмітрый Піневіч заявіў, што медыкам абмяжуюць беспасярэднія кантакты з прадстаўнікамі замежных фармакалагічных кампаніяў, а адукацыйныя сустрэчы перавядуць у онлайн.
Антон Тачняк belsat.eu