Уладзімір Пуцін прапанаваў папраўкі ў закон аб грамадзянстве. Ён хоча пазбаўляць расейскіх пашпартоў за «фэйкі» пра армію і знявагу трыкалору. Што праўда, гэтыя навацыі тычацца толькі тых, хто атрымаў грамадзянства РФ не па нараджэнні, пішуць расейскія медыі.
Прэзідэнт Расеі прапанаваў змяніць закон пра грамадзянства. Уладзімір Пуцін унёс свае папраўкі ў Дзярждуму. Навацыі тычацца тых, хто атрымаў грамадзянства РФ не па нараджэнні – гэта, напрыклад, жыхары акупаваных тэрыторыяў Украіны, дзе Расея раздавала свае пашпарты, і мігранты.
У прыватнасці, Пуцін прапанаваў адбіраць расейскае грамадзянства за «дыскрэдытацыю» арміі, знявагу сцяга і герба РФ, замах на дзяржаўнага або грамадскага дзеяча.
Таксама ў спісе падстаў для пазбаўлення грамадзянства:
- публічныя заклікі да экстрэмісцкай дзейнасці;
- публічныя заклікі да парушэння тэрытарыяльнай цэласнасці Расеі;
- узброены мяцеж;
- хабарніцтва;
- хуліганства;
- вандалізм;
- выкраданне асобы;
- грабеж;
- разбой;
- незаконнае захоўванне зброі.
Таксама грамадзянства будуць пазбаўляць за «дзеянні, што ствараюць пагрозу бяспекі Расейскай Федэрацыі». На гэтай падставе пашпарт адбяруць у незалежнасці ад таго, калі адбыліся «пагражальныя дзеянні»: да атрымання грамадзянства ці ўжо пасля.
У дадатак да гэтых паправак Дзярждума ўжо ўхваліла ў першым чытанні законапраект аб пазбаўленні грамадзянства Расеі за цяжкія злачынствы супраць дзяржавы, тэрарызм, наркагандаль і падробку дакументаў.
Канчатковае ўхваленне законапраекта чакаецца да канца года.
Сяргей Крот belsat.eu
