Дзяржаўнае тэлебачанне анансавала сюжэт пра расследаванне тэрактаў, якія нібыта мелі адбыцца ў Беларусі 9 траўня. Пра гэта паведамляе «Вясна».
10 траўня дзяржаўнае тэлебачанне паказала відэа з анонсам расследавання «тэрактаў», якія нібыта павінны былі адбыцца ў Беларусі напярэдадні 9 траўня. Мяркуючы з відэа, затрыманыя як мінімум тры чалавекі.
«Белсат» паведамляў 9 траўня, што старшыня КДБ РБ Іван Церцель заявіў: ягоным падначаленым удалося спыніць спробы здзяйснення тэрактаў напярэдадні 9 траўня. Ён абяцаў абнародаваць інфармацыю 10 траўня. Ён назваў меркаваныя тэракты спробай ускалыхнуць сітуацыю, казаў, што Аляксандр Лукашэнка «ў курсе гэтых момантаў».
«Мы затрымалі пэўную колькасць асобаў, якія рыхтаваліся да ўчынення тэрактаў. І ведаем, што за гэтым стаяць спецслужбы. Я не хачу цалкам раскрываць сёння», – заявіў Іван Церцель.
Пры гэтым паведаміў, што чакаецца эскалацыя напружанасці вакол краіны і на даручэнне Лукашэнкі спецслужбы працуюць над тым, каб не адбылося нічога, што «магло б парушыць спакой нашых грамадзянаў». У працы ўдзельнічаюць таксама МУС і Дзяржаўны памежны камітэт. Праца на мяжы ідзе ва ўзмоцненым рэжыме.
Антон Тачняк belsat.eu
