Танкі павінны прыбыць ва Украіну ў пачатку восені. Пра гэта заявіў кіраўнік аддзелу армейскіх закупак амерыканскага войска Даг Буш, паведамляе CNN.
Паводле Буша, адпраўка першай партыі танкаў «Abrams» была зацверджаная ў мінулыя выходныя.
«Цяпер яны павінны трапіць у Еўропу, а затым ва Украіну разам з усімі рэчамі, якія дадаюцца. Боепрыпасы, запасныя часткі, паліўнае абсталяванне, рамонтавая база. Такім чынам, гэта не толькі танкі, гэта поўны пакет, які ідзе з імі», – заявіў ён.
ЗША пачалі навучанне ўкраінцаў на танках «Abrams» у траўні ў Нямеччыне. Плануецца, што ЗСУ атрымаюць ад амерыканцаў 31 танк.
Даг Буш таксама паведаміў журналістам, што адміністрацыя прэзідэнта ЗША Джо Байдэна працуе над запытам аб дадатковым фінансаванні Украіны, які, верагодна, будзе гатовы для разгляду Кангрэсам восенню 2023 года.
Глеб Нержын belsat.eu
