У Менску зладзілі пасяджэнне арганізацыйнага камітэту аб стварэнні палітычнай партыі «Белая Русь», перадае БелТА. Гэта будзе не рэарганізацыя праўладнага аб’яднання – у краіне будуць дзве структуры з аднолькавай назвай. Партыя мусіць з’явіцца да лета.
Пасяджэнне арганізацыйнага камітэту аб стварэнні палітычнай партыі «Белая Русь» зладзілі ў Нацыянальнай бібліятэцы. У складзе камітэту – «прадстаўнікі грамадзянскай супольнасці, кіраўнікі буйных грамадскіх аб’яднанняў», піша агенцтва БелТА.
Старшыня рэспубліканскага грамадскага аб’яднання «Белая Русь» Алег Раманаў заявіў, што «партыя будуецца з нуля»:
«Мы не пераўтвараем грамадскага аб’яднання «Белая Русь», яно застаецца ў палітычнай і грамадскай прасторы краіны. Новая партыя будзе самастойнай сілай, накіраванай на развязанне тых вострых праблемаў, якія стаяць перад нашым грамадствам і ў цэлым у свеце».
Раманаў сказаў, што патрэба ў новай партыі тлумачыцца «ўзрослай сталасцю грамадзянскай супольнасці, людзі адчулі неабходнасць актыўнага ўдзелу ў палітычным жыцці». Таксама «Белая Русь» будзе «суб’ектам адказу на жорсткія выклікі, кінутыя нашай краіне».
«У свеце ідзе вайна. І для таго каб Беларусь была выспай стабільнасці, росквіту і поспеху, мы мусім прыкладаць вельмі сурʼёзныя намаганні. Наша партыя будзе адной з такіх сілаў, якая зможа генераваць адказы на выклікі, якія неабходна развязваць у нашай краіне», – заявіў прадстаўнік «Белай Русі».
Ён анансаваў фармальнае стварэнне партыі да канца вясны і адзначыў, што сябры партыі будуць удзельнічаць у выбарах.
Летась у жніўні Аляксандр Лукашэнка казаў, што спяшацца са стварэннем праўладнай партыі не трэба: «Трэба саспець, падысці ў спакойным рытме». Тады ж ён не выключыў, што «пытанне паўстане» пасля ўхвалення Закону аб палітычных партыях.
Гэты нарматыўна-прававы дакумент ужо прынялі абедзве палаты парламенту. Міністр юстыцыі Сяргей Хаменка на мінулым тыдні заявіў, што «найбліжэйшым часам» пачнецца перарэгістрацыя партыяў. Фактычна працэдура пераўтворыцца ў закрыццё шмат якіх апазіцыйных арганізацыяў. У прыватнасці, у Аб’яднанай грамадзянскай партыі адзначылі, што ў іх іншага варыянту, акрамя ліквідацыі, не будзе.
Сяргей Крот belsat.eu