У Беларусі робяць новыя захады для «мінімізацыі пагрозы распаўсюду» каронавіруснай інфекцыі. Адпаведны ліст Міністэрства аховы здароўя апублікавала ў Twitter карыстальніца little_vlady.
Ліст адрасаваны Менгарвыканкаму, аблвыканкамам і падначаленым Мінздару бюджэтным арганізацыям.
Паводле яго, для мінімізацыі кантактаў медыкаў, якія з’яўляюцца кантактамі 1-га ўзроўню, з насельніцтвам, начальнікам абласных і Менскага гарадскога ўпраўленняў аховы здароўя даручана «стварыць Кантактныя цэнтры ды ўмовы знаходжання ў іх (вылучэнне спальных месцаў, забеспячэнне харчаваннем і іншае) працаўнікоў аховы здароўя».
11 красавіка міністр аховы здароўя Беларусі Уладзімір Каранік паведаміў, што ў Беларусі 301 медык інфікаваны на COVID-19.
Па стане на 12 красавіка Міністэрства аховы здароўя паведаміла пра 2 578 зарэгістраваныя выпадкі заражэння каронавіруснай інфекцыяй у Беларусі. Ахвярамі каронавіруса сталі ўжо 26 асобаў. Пасля лячэння выпісаныя 203 чалавекі.
МГ belsat.eu