Камандаванне Паветраных сілаў ЗСУ паведамляе, што ў ноч на 28 траўня Расея запусціла 54 дроны-камікадзэ «Shahed-136/131». Гэта рэкордная колькасць.
Расейцы атакавалі Украіну з двух кірункаў: паўночнага (Бранская вобласць) і паўднёвага (Краснадарскі край).
Украінская паветраная абарона знішчыла 52 з 54 дронаў.
«Чарговы начны напад вораг быў скіраваны на вайсковыя аб’екты і абʼекты крытычнай інфраструктуры дзяржавы ў цэнтральных рэгіёнах краіны, у прыватнасці на Кіеўшчыну. Тут, у зоне адказнасці паветранага камандавання «Цэнтр», знішчаная большасць ударных дронаў», – паведамляе камандаванне Паветраных сілаў.
Кіеўскія ўлады адзначаюць, што гэта была 14-ая паветраная атака на Кіеў з пачатку траўня. У выніку падзення абломкаў ёсць ахвяры і разбурэнні ў розных раёнах украінскай сталіцы. У Галасііўскім раёне абломкі трапілі ў 7-павярховы нежылы будынак: загінуў адзін чалавек, яшчэ адзін шпіталізаваны.
Глеб Нержын belsat.eu
