«Зараз найлепшы шанец». Ціханоўская заклікала выгнаць расейскіх вайскоўцаў з Беларусі
Абраная прэзідэнтка Беларусі Святлана Ціханоўская звярнулася да беларусаў з нагоды хаосу ў Расеі, «які ўсё больш становіцца падобны да грамадзянскай вайны».
«Лукашэнка і Пуцін спрабуюць уцягнуць у вайну і нашую Беларусь. Яны прыкрываюцца Саюзнай дзяржавай. Яны кажуць: Расея – ваш саюзнік. Але гэты саюзнік нясе хаос, вайну, крызіс. Пуцін можа паспрабаваць уцягнуць беларускіх вайскоўцаў у свой унутраны канфлікт, каб ён стаў і нашым канфліктам таксама», – заявіла Святлана Ціханоўская.
Яна заклікала беларускіх дыпламатаў, вайскоўцаў і сілавікоў памятаць, што ў беларусаў свае нацыянальныя інтарэсы, і што «ні Пуцін, ні Прыгожын – не сябры Беларусі».
Паводле яе, галоўная задача ўсіх беларусаў цяпер – захаваць бяспеку і суверэнітэт у Беларусі, «выратаваць нашую краіну ад таго, у што ператварылася Расея».
«Мы павінны быць гатовыя да любога сцэнара», – сказала Ціханоўская.
Звяртаючыся да вайскоўцаў, яна адзначыла:
«Зараз найлепшы шанец выгнаць расейскіх вайскоўцаў з нашай краіны. Калі гэты шанец будзе прапушчаны, Расея зробіць з намі так жа, як з Украінай».
Ціханоўская адзначыла, што Беларусь павінна закрыць мяжу з Расеяй і пачаць вывад расейскіх войскаў з беларускай тэрыторыі.
Яна таксама паведаміла, што кіраваць створаным аператыўным штабам прызначаны Валер Сахашчык.
«Мы запрашаем да ўдзелу прадстаўнікоў дэмакратычных структураў, палка Каліноўскага і беларускіх добраахвотнікаў. Мы сочым за сітуацыяй. Мы будзем дабівацца міжнароднай падтрымкі нашых дзеянняў. Нашая вера ў беларусаў моцная – мы ведаем, што беларусы заўсёды абяруць Беларусь», – сказала Ціханоўская.
Якуб Хруст belsat.eu
