Пра звальненне начальніка Цэнтральнага РАУС Гомля Аляксандра Штрапаў паведамляе «Радыё Свабода». Крыніцы «РС» сцвярджаюць, што ён знаходзіцца пад следствам.
Па серадах Штрапаў мусіў праводзіць прыём грамадзянаў – як асабіста, так і на «гарачай лініі». Але на прыём да яго ў сераду людзі ня трапілі, і на тэлефанаванні начальнік РАУС не адказваў. Прозвішча Штрапава знікла з графіку асабістых прыёмаў.
Ад дзвюх крыніцаў Свабода даведалася, што Штрапаў сапраўды больш не начальнік аддзелу ўнутраных справаў. «Ён звольнены па асабістаму жаданню, знаходзіцца пад следствам за перавышэнне службовых паўнамоцтваў. А былыя калегі – міліцыянты, цяпер актыўна пішуць даносы адзін на аднаго, бо шмат хто ў аддзеле быў замешаны ў перавышэнні паўнамоцтваў», – распавяла Свабодзе крыніца, звязаная з праваахоўнымі органамі.
«У перыяд пратэстаў начальнік і супрацоўнікі Цэнтральнага РАУС здзекаваліся з людзей, збівалі затрыманых. Пасля гэтага яны адчулі сябе «звышчалавекамі» і пачалі сваволю – ставілі людзей на «праслухоўку», за грошы злівалі дадзеныя. Гэта называецца «парушалі рэжым сакрэтнасці». Цяпер палова аддзелу – у істэрыцы, палова піша даносы. Але Штрапаў не ў СІЗА, ён на свабодзе», – распавяла іншая крыніца.
Ёсць сведчанні, што падчас пратэстаў 2020 года Штрапаў асабіста збіваў людзей.
ІІ belsat.eu