Палякі і беларусы Польшчы сабралі 21,5 млн злотых на «Байрактар». Засталося 5 дзён і яшчэ мільён
Амаль завяршыўся польскі збор грошай на ўдарны беспілотнік для ўкраінскага войска. На «Байрактар» скінуліся ўжо амаль 200 тысяч чалавек.
Польскі журналіст Славомір Серакоўскі запусціў грашовы збор «Купім Байрактар Украіне» на сайце Zrutka.pl: на беспілотнік хочуць сабраць 22,5 млн злотых (5 млн долараў). На момант публікацыі сабрана 21,5 млн, застаўся яшчэ 1 млн і пяць дзён збору.
Асаблівасць збораў на сайце Zrutka.pl у тым, што там можна ахвяраваць не толькі ў агульную скарбонку, але і ў асобныя «тэматычныя». Самая папулярная «тэматычная» скарбонка гэтага збору – ад беларусаў Польшчы, туды 675 чалавек закінулі 86,5 тысячы злотых. Другая паводле сабранай сумы – для праціўнікаў аўтара збору, якія ўсё роўна хочуць дапамагчы Украіне.
Колькі беларусы ахвяравалі агулам, невядома: сайт дазваляе даваць грошы ў агульную скарбонку і іншыя скарбонкі незалежна ад грамадзянства.
Раней на «Байрактар» для Украіны літоўцы сабралі 6 млн еўра за тры дні, а ўкраінцы сабралі грошы аж на тры «Байрактары» – а вытворца дронаў вырашыў даць «Байрактары» бясплатна, таму сабраныя грошы пойдуць на боепрыпасы і іншыя патрэбы.
«Bayraktar TB2» – турэцкі ўдарны беспілотнік сярэдняй вышыні палёту, што распрацоўваўся з 2007 года і ўпершыню падняўся ў неба ў 2014-м. Апарат можа кіравацца з далёкасці да 150 км і быць у паветры больш чым 24 гадзіны, можа несці дзве супрацьтанкавыя ракеты з лазернай наводкай або чатыры высокадакладныя авіябомбы. Такія беспілотнікі выкарыстоўвае як сама Турцыя, так і Украіна, Польшча, Азербайджан, Кыргызстан, Туркменістан, Катар, Марока, Пакістан ды іншыя.
Рэвалюцыйная асаблівасць «Байрактара» – параўнальна невысокая цана, бо аналагі каштуюць дзясяткі мільёнаў долараў. Эфектыўнасць «Байрактараў» на вайне ва Украіне ацэньваюць па-рознаму, адзначаюць іх уразлівасць адносна сістэмаў супрацьпаветранай абароны. Але «Байрактарамі» знішчылі ўжо нямала расейскай ваеннай тэхнікі, у тым ліку караблі, а беспілотнікі сталі ва Украіне мэмам, якому прысвячаюць песні.
Тым часам на сайце «BySol» блізкі да поўнай сумы збор на гуманітарную дапамогу Украіне: сабраныя 144 тысячы еўра з неабходных 150 тысяч. На групу авіявыведкі для беларускіх добраахвотнікаў сабралі 38 тысяч еўра з неабходных 60 тысяч.
Алесь Наваборскі belsat.eu
