Памежная ахова Польшчы сцвярджае, што Беларусь прыцягвае замежнікаў на беларуска-польскую мяжу, бо зарабляе на іх. Кошт за дапамогу ў незаконным пераходзе мяжы даходзіць да 10 тысяч еўраў.
19 жніўня польскія памежнікі апублікавалі чарговае відэа спробы незаконнага пераходу праз мяжу з боку Беларусі.
«Апавяшчэнне з электроннага бар’еру дазволіла аператыўна накіраваць памежны патруль да месца, дзе замежнік спрабаваў незаконна прайсці мяжу. Мігранты пры выглядзе патруля адступілі – заплацілі беларускаму боку за незаконны праезд праз Польшчу ў Нямеччыну ці іншыя дзяржавы ЕЗ», – паведамляе ведамства.
За 18 жніўня ў Польшчу спрабавалі трапіць 123 замежнікі – грамадзяне Егіпту, Эфіопіі, Сірыі, Эрытрэі, Емену, Ірану, Самалі.
На латвійска-беларускай мяжы затрымалі 32 асобаў, на літоўска-беларускай спробаў нелегальнага пераходу мяжы не зафіксавалі, прыводзіць лічбы радыё «Свабода».
З пачатку 2023 года зафіксавана 27 045 спробаў незаконнага пранікнення ў Еўразвяз з беларускай тэрыторыі: у Польшчу – 19 501, Латвію – 6004, Літву – 1540.
Марыя Міхалевіч belsat.eu