У сацсетках з’явілася фота ваяроў ЗСУ ў Клішчыеўцы, што пад Бахмутам у Данецкай вобласці. Фота сярод іншых апублікаваў тэлеграм-канал «Pravda Gerashchenko».
«На фота ваяры палку «Цунамі» і брыгады «Лют» разгарнулі ўкраінскі сцяг. Чакаем афіцыйную інфармацыю.», – гаворыцца ў каментары да здымка.
Вайскоўцы сфатаграфаваліся на тле разбуранай Пакроўскай царквы.
Полк Каліноўскага 15 верасня паведаміў аб вызваленні вёскі Клішчыеўка ў Бахмуцкім раёне Данецкай вобласці і апублікаваў кадры, як байцы ідуць праз населены пункт. Раней, 13 верасня, падчас баёў Клішчыеўка перайшла ў шэрую зону. Аднак пазней у тэлеграм-канале ПКК з’явілася інфармацыя, што баі яшчэ працягваюцца.
16 верасня Генштаб ЗСУ фіксаваў поспех сваіх вайскоўцаў у Клішчэеўцы. Расейскі ваенкар Сямён Пегаў паведамляў пра контратаку войскаў РФ у паўночна-ўсходняй частцы сяла.
Праўкраінскі «Бахмутський Демон» сцвярджаў, што спроба расейцаў вярнуць раней страчаныя пазіцыі была няўдалай, і цяпер яны ў асноўным засяродзіліся на нанясенні артылерыйскіх удараў. Зачыстка Клішчэеўкі працягвалася.
Якуб Хруст belsat.eu