Суд у «справе Каардынацыйнай рады» і новая «экстрэмісцкая» кніга. Рэпрэсіі за 17 студзеня

Паседжанне Менскага гарадскога суда ў «справе Каардынацыйнай рады». 17 студзеня 2023 года.

Фота: БелТА / belta.by

У Менску 17 студзеня пачаўся завочны суд над Святланай Ціханоўскай, Паўлам Латушкам, Вольгай Кавальковай, Марыяй Мароз і Сяргеем Дылеўскім. Справу вядзе суддзя Пётр Арлоў. Усіх абвінавачваных судзяць у межах адной крымінальнай справы, агулам ім інкрымінуюць 12 артыкулаў Крымінальнага кодэксу:

• ч. 2 арт. 292 («Захоп будынкаў і збудаванняў»);
• ч. 2 арт. 293 («Рыхтаванне да ўдзелу ў масавых беспарадках»);
• ч.1 арт. 357 («Змова з мэтай захопу ўлады неканстытуцыйным шляхам»);
• ч. 1 і ч. 2 арт. 361-1 («Стварэнне экстрэмісцкіх фармаванняў і кіраванне імі, здзейсненыя паўторна»);
• ч. 3 арт. 361 («Заклікі да санкцыяў, іншых дзеянняў, накіраваных на прычыненне шкоды нацыянальнай бяспецы Рэспублікі Беларусь»);
• ч. 3 арт. 130 («Распальванне варожасці»);
• ч. 1 арт. 356 («Здрада дзяржаве»);
• ч. 2 арт. 191 («Перашкода ажыццяўленню выбарчых правоў, права на ўдзел у рэферэндуме»);
• ч. 2 арт. 342 («Рыхтаванне асобаў для ўдзелу ў групавых дзеяннях, якія груба парушаюць грамадскі парадак»);
• ч. 3 арт. 430 («Атрыманне хабару»);
• ч. 3 арт. 426 («Перавышэнне ўлады і службовых паўнамоцтваў»;
• ч. 4 арт. 16 і арт. 382 («Арганізацыя і кіраўніцтва самавольнага прысваення звання і ўлады службовай асобы»).

Павел Латушка даслаў пісьмовы адвод адвакату на адрас Менгарсуда. Абаронца пагадзіўся з хадайніцтвам, але суд яго не задаволіў, матываваўшы гэта тым, што ўдзел абаронцы ў працэсе абавязковы. У адказ на хадайніцтва Святланы Ціханоўскай аб перадачы ёй матэрыялаў справы для азнаямлення суд паведаміў, што азнаёміцца магчыма толькі ў памяшканні Менгарсуда.

Суд Цэнтральнага раёну Менску прызнаў «экстрэмісцкімі матэрыяламі» кнігу «”Вызваленыя” i заняволеныя. Польска-беларускае памежжа 1939–1941 гг. у дакументах беларускіх архіваў».

У Гомлі асудзілі палітвязня Аляксандра Пугача на 3,5 года калоніі ва ўмовах агульнага рэжыму за абразу Лукашэнкі і генеральнага пракурора. Яго судзілі паводле ч. 1 арт. 130 («Распальванне іншай сацыяльнай варожасці»), ч. 1 арт. 366 («Гвалт або пагроза гвалту ў дачыненні службовай асобы»), ч. 1 арт. 368 («Абраза Лукашэнкі»), арт. 369 («Абраза прадстаўніка ўлады») Крымінальнага кодэксу. Таксама ён павінен выплаціць кампенсацыю маральнай шкоды памерам Br 10 тыс. і 100 базавых велічыняў.

У судзе Ленінскага раёну Менску 23 снежня за ўдзел у двух пратэсных маршах у 2020 годзе асудзілі 35-гадовага Паўла Рэменчыка. Мужчыну асудзілі да 2,5 года «хатняй хіміі». Падставай для затрымання паслужыў фотаздымак з Паўлам, перададзены супрацоўнікамі ГУБАЗіКу. Падчас ператрусу ў мужчыны знайшлі байку, у якой ён быў на маршы, а ў тэлефоне – фотаздымак, якія і паслужылі доказамі ягонай віны паводле ч. 1 арт. 342 КК («Актыўны ўдзел у групавых дзеяннях, якія груба парушаюць грамадскі парадак). Павел на судзе цалкам прызнаў віну і да суда часткова кампенсаваў нанесеную шкоду. На працэсе ён распавёў, што ведаў, што на тэрыторыі Менску адбываюцца акцыі пратэсту. Ад іншых удзельнікаў ён атрымаў бясплатна бел-чырвона-белы сцяг, які пазней «выкарыстоўваў як атрыбутыку на пратэсных мерапрыемствах».

Алена Рувіна belsat.eu