Памежная ахова Польшчы паведаміла, што 11 жніўня група агрэсіўных мігрантаў спрабавала трапіць у краіну з тэрыторыі Беларусі. Каб іх спыніць, на месца прыехаў вадамёт.
40 мігрантаў намагаліся перасекчы мяжу з тэрыторыі Берасцейскай вобласці. За гэты адцінак адказвае аддзел Памежнай аховы Польшчы ў Дубічах-Царкоўных.
Як распавялі ў ведамстве, парушальнікі кідалі камяні, у аднаго з мігрантаў быў нож. «На месца інцыдэнту быў накіраваны вадамёт «Tajfun». Групу не прапусцілі праз мяжу», – гаворыцца ў паведамленні. Ці быў ужыты вадамёт, не ўдакладняецца.
Акрамя таго, непадалёк гэтага месца група з 25 мігрантаў здолела мінуць мяжу праз раку. Грамадзянаў Іраку, Ірану, Пакістану, Туркменістану і Сірыі спынілі.
Агулам за мінулыя содні з Беларусі ў Польшчу намагаліся трапіць 106 асобаў.
Сёлета Польшча зафіксавала ўжо 19 тысячаў спробаў парушэння мяжы. Летась такіх выпадкаў было 16 тысячаў.
У польскім МЗС раней назвалі спыненне атакі мігрантаў на мяжу адною з умоваў паляпшэння адносінаў паміж Варшаваю і Менскам. У ведамстве заявілі пра гэта ў адказ на словы Аляксандра Лукашэнкі аб неабходнасці замірыцца з суседнімі краінамі ЕЗ.
Сяргей Крот belsat.eu