Суддзя Менскага гарадскога суда Любоў Сімахіна абвесціла вырак палітзняволенай Яне Пінчук: 12 гадоў калоніі. Дзяўчыну абвінавацілі паводле пяці артыкулаў, у тым ліку ў стварэнні экстрэмісцкага фармавання і ўдзеле ў тэрарыстычнай арганізацыі, піша тэлеграм-канал «Свободу Яне Пинчук!».
Яну Пінчук затрымалі ў Санкт-Пецярбурзе ў лістападзе 2021 года. Летась у траўні суд у Расеі адмовіўся даць ёй часовы прытулак, і праз некалькі месяцаў яе экстрадавалі ў Беларусь, нягледзячы на забарону Камітэту правоў чалавека ААН.
Паводле следства, Пінчук адміністравала тры пратэсныя тэлеграм-каналы і «больш за год займалася дыскрэдытацыяй афіцыйнай улады ў інтэрнэце і заклікамі да ўдзелу ў масавых акцыях пратэсту».
Дзяўчыну абвінавацілі паводле пяці артыкулаў, у тым ліку ў стварэнні экстрэмісцкага фармавання, удзеле ў тэрарыстычнай арганізацыі, закліках да санкцыяў і распальванні варожасці.
Разгляд справы ў Менскім гарадскім судзе пачаўся 10 красавіка. Спачатку працэс вяла суддзя Таццяна Фалькоўская, 3 траўня яе замяніла Любоў Сімахіна. Сёння яна агучыла прысуд: 12 гадоў калоніі.
Сяргей Крот belsat.eu