Папа Рымскі Францішак разглядае магчымасць наведаць Украіну, паведаміў журналіст тэлеканалу «NBC News» Клаўд’ё Ляванга, які суправаджаў Папу ў паездцы на Мальту.
«Падчас палёту на Мальту я спытаў у Папы Францішка, ці разглядае ён прапанову наведаць Кіеў. Ён адказаў: «Так, гэта на стале», – напісаў журналіст у Twitter.
Таксама Папа Рымскі абрынуўся з крытыкай на Пуціна за развязванне «жорсткай вайны»:
«Мы думалі, што ўварванне ў іншыя краіны, жорсткія вулічныя баі і ядравыя пагрозы былі змрочнымі ўспамінамі аб далёкім мінулым. Але чарговы раз нейкі ўладар, на жаль, загразлы ў анахранічных заявах аб нацыяналістычных інтарэсах, правакуе і распальвае канфлікты, у той час як простыя людзі адчуваюць неабходнасць будаваць будучыню, якая або будзе агульнай, або не будзе ўвогуле».
Раней прэзідэнт Украіны Уладзімір Зяленскі і мэр Кіева Віталій Клічко запрашалі галаву Рымска-каталіцкага Касцёлу наведаць Украіну.
АД belsat.eu