З 15 красавіка ўрад скасаваў рэгуляванне цэнаў на больш як сотню відаў тавараў. Пакінуў да 1 траўня рэгуляванне цэнаў на сем тавараў – і 17 красавіка падняў гэтыя цэны.
Савет Міністраў Беларусі 16 красавіка ўхваліў пастанову, якая мяняе сістэму рэгулявання цэнаў. Гэтую пастанову афіцыйна апублікавалі 17 красавіка, яна набыла моц.
Пастанова мяняе цэны на сем відаў тавараў: яблыкі і шэсць відаў гародніны. Мяняюцца цэны на тавары са «стабілізацыйных фондаў» і максімальныя агулавыя ды раздробныя цэны на тыя самыя тавары. Цэны вызначаюць на кожны месяц, але ў траўні – толькі на паўмесяца, да 15-га, і толькі на бульбу, капусту і цыбулю. Цэнаў на агуркі, буракі, моркву і яблыкі ў траўні не вызначалі.
Максімальныя раздробныя цэны наступныя.
- Агуркі свежыя: 7,56 рубля. У сакавіку было 7,28.
- Бульба свежая спажывецкая, за выключэннем мытай: 1,5 рубля за кілаграм у красавіку і да 15 траўня. У сакавіку было 1,1.
- Буракі свежыя сталовыя, за выключэннем мытых: 1,39 рубля за кілаграм у красавіку. У сакавіку было 1,3.
- Капуста белакачанная свежая, за выключэннем ранняй: 1,8 рубля за кілаграм у красавіку і да 15 траўня. У сакавіку было 1,37.
- Морква свежая, за выключэннем мытай: 1,56 рубля за кілаграм у красавіку. У сакавіку было 1,45.
- Цыбуля свежая сталовая, за выключэннем мытай: 2,25 рубля за кілаграм у красавіку і да 15 траўня. У сакавіку было 1,84.
- Яблыкі свежыя: 4,21 рубля за кілаграм у красавіку. У сакавіку было 3,83.
З мінулага кастрычніка агуркі і капуста падаражалі амаль удвая. Бульба, буракі, морква і яблыкі падаражалі ў паўтара раза.
У пачатку красавіка была апублікаваная пастанова ўраду, якая ўжо шосты раз змяніла сістэму рэгулявання цэнаў. Са спісу тавараў, на якія рэгулююць цэны, выкраслілі 120 пазіцыяў. У пераліку засталіся шмат якія харчы, вопратка, крыху мэблі, базавая побытавая тэхніка, будаўнічыя матэрыялы, некаторыя мыйныя сродкі, дзіцячыя тавары, аўтазапчасткі.
Аляксандр Лукашэнка раней паўтараў, як заклён, што цэны ў краіне мусяць быць «справядлівымі», хаця незалежныя эканамісты пярэчылі, што справядлівага цэнаўтварэння не існуе. У выніку рэгулявання цэнаў, што пачалося ў 2022 годзе, шмат якія прадпрыемствы зазналі страты. Хоць некаторыя тавары забаранілі вывозіць з Беларусі, яны знікалі з крамаў. Звычайныя, здавалася б, памідоры і часнок у выніку пачалі каштаваць даражэй за экзатычныя мандарыны і ананасы. Тавары на велікодны стол у Польшчы каштуюць на траціну больш, чым у Беларусі, пры тым што заробкі ў Польшчы ўтрая вышэйшыя за беларускія. А трускаўкі ў Польшчы можна знайсці ўтрая танней.
Алесь Наваборскі belsat.eu
