У ноч на 14 жніўня ўзброены чалавек распачаў стральбу па аўтобусе каля Сцяны плачу ў Іерусаліме. Раненні атрымалі прынамсі восем асобаў, паведамляе ВВС са спасылкай на ўлады Ізраілю.
Напад на аўтобус адбыўся а 01:24 мясцовага часу, калі вернікі вярталіся з малітвы каля Сцяны плачу.
«Мы спусцілі пандус для чалавека на інвалідным вазку, а потым пачалася стральба. Усе пачалі крычаць і ўпалі на падлогу. Я паспрабаваў з’ехаць, але аўтобус не можа рухацца з адкрытым пандусам», – распавёў журналістам кіроўца аўтобуса Дэніэл Канеўскі.
Падазраваны ў нападзе 27-гадовы палестынец з Усходняга Іерусаліму спачатку ўцёк, але пазней сам здаўся ўладам, паведамляюць мясцовыя СМІ. Ізраільская паліцыя пакуль не пацвердзіла, што менавіта гэты чалавек страляў.
Праваахоўныя органы Ізраілю кваліфікуюць напад як тэракт. Прэм’ер-міністр Ізраілю Яір Ляпід падкрэсліў у каментары ВВС, што датычныя да нападу «заплацяць за шкоду, нанесеную мірным жыхарам».
Двое параненых застаюцца ў крытычным стане, у тым ліку – цяжарная жанчына. Ёй тэрмінова зрабілі кесарава сячэнне, дзіця выжыла, яно ў цяжкім, але стабільным стане.
Інцыдэнт адбыўся праз тыдзень пасля ўзброенай аперацыі Ізраілю ў сектары Газа, у выніку якой там былі забітыя 47 асобаў.
Марыя Міхалевіч belsat.eu