«Белсат» падводзіць вынікі 840-х содняў поўнамаштабнай вайны, распачатай Расеяй ва Украіне. Пра галоўныя падзеі на вечар 12 чэрвеня чытайце ў нашым аглядзе.
На поўначы Харкаўскай вобласці працягваюцца баявыя дзеянні на поўначы ад буйнога сяла Лыпці і на тэрыторыі гораду Ваўчанск ды ваколіцаў (у Харкаўскім і Чугуеўскім раёнах адпаведна).
Ваенкар Сямён Пегаў гаворыць, што большай актыўнасцю на гэтых участках фронту адзначаюцца ўкраінскія вайскоўцы.
Іншая прарасейская крыніца – тэлеграм-канал «Рыбарь» – фіксуе поспехі Збройных сілаў Украіны ў Ваўчанску, але не лічыць іх значнымі.
Праўкраінскі «Офіцер» піша, што ЗСУ зачысцілі яшчэ некалькі вуліцаў у горадзе, але сітуацыя ў паселішчы застаецца складаная, таму рух ідзе павольна – ад будынку да будынку.
У гэты ж час на лыпціўскім участку ўкраінцы прасунуліся на адлегласць да 600 метраў і маюць перспектывы для развіцця поспеху.
Агулам, паводле крыніцы, харкаўскі кірунак – адзіны ўчастак фронту, дзе Збройныя сілы ўдала наступаюць.
Між тым прарасейскі канал «Северный Ветер» сцвярджае, што Узброеныя сілы РФ прасунуліся ў Ваўчанску і каля Лыпцяў – на 200 і 250 метраў адпаведна. Акрамя гэтага, фіксуюцца поспехі войскаў РФ у ваколіцах сяла Зялёнае (на паўночным усходзе ад Лыпцяў недалёка ад мяжы з Расеяй), дзе яны прасунуліся ўздоўж ракі Мурам і замацоўваюцца на панавальных вышынях.
У Генеральным штабе Збройных сілаў Украіны паведамілі, што на купянскім кірунку баявыя дзеянні лакалізуюцца ў ваколіцах Пішчанага, Петрапаўлаўкі і Мясажароўкі, прычым каля апошняга сяла сітуацыя застаецца напружанаю для Сілаў абароны краіны.
«Рыбарь» піша, што таксама УС РФ намагаюцца прасунуцца ў бок Стэпавай Навасёлаўкі, інфармацыю пацвярджаюць аналітыкі праекту «Deepstate».
На суседнім ліманскім кірунку расейцы цягам апошніх содняў атакавалі каля Дружалюбаўкі і Неўскага, а таксама на тэрыторыі Серабранскага лясніцтва, але поспеху не дасягнулі. Сітуацыя застаецца пад кантролем ЗСУ.
На гэтак званым сівэрскім выступе па фронце фіксуецца напружаная для Сілаў абароны Украіны сітуацыя каля сёлаў Спірнае і Раздолаўка, дзе з пачатку содняў адбылося не менш за 11 баявых сутыкненняў. Агулам, паводле Генштабу ЗСУ, гэта адзін з самых гарачых кірункаў.
На краматорскім кірунку працягваюцца баі ва ўсходняй частцы гораду Часаў Яр, дзе расейцы намагаюцца адкінуць ЗСУ за канал Сівэрскі Данец – Данбас. Ваенкар Пегаў паведамляе пра тактычныя поспехі УС РФ.
На захадзе ад Аўдзееўкі ініцыятыва таксама застаецца за Узброенымі сіламі РФ.
У «Deepstate» фіксуюць прасоўванні расейцаў каля Сокала і ў суседнім ад яго Новапакроўскім.
Прарасейскі тэлеграм-канал «НгП раZVедка» сцвярджае, што рухаюцца войскі РФ і ў самім Сокале, дзе пад іхным кантролем ужо каля 50 % тэрыторыі паселішча.
З поўначы ад гэтага ўчастку фронту, паводле крыніцы, расейцы выбілі праціўніка з панавальнай вышыні каля Новааляксандраўкі і занялі дамбу, што істотна пагоршыла становішча Збройных сілаў.
На курахаўскім кірунку, паводле ўкраінскага камандавання, войскі РФ ціснуць у ваколіцах Краснагораўкі і Георгіеўкі, але поспеху не маюць – сітуацыя застаецца пад кантролем ЗСУ.
Прарасейскі тэлеграм-канал «Архангел Спецназа» піша, што ніжэй па фронце ідуць баі за дарогу з поўдня ад Парасковіеўкі, якая вядзе да суседняй Канстанцінаўкі. Адзначаецца, што пакуль расейцы не могуць прасунуцца праз шчыльныя ўдары артылерыі і FPV-дронаў праціўніка.
На паўднёвым участку фронту ў Данецкай вобласці УС РФ штурмуюць з поўдня сяло Уражайнае, але пакуль Сілам абароны Украіны ўдаецца трымаць пазіцыі.
Нязменным застаецца фронт і ў Запарожскай вобласцяў, дзе баявыя дзеянні лакалізуюцца ў ваколіцах Арэхава.
Праўкраінскі тэлеграм-канал «Говорять Снайпер» паведамляе, што ў Херсонская вобласці Узброеныя сілы РФ наступаюць на левым беразе Дняпра, але пакуль не могуць выбіць ЗСУ з займаных плацдармаў.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu