Міністэрства ўнутраных справаў і адміністравання Польшчы паведаміла пра ўвядзенне часовай забароны на прысутнасць на пэўных тэрыторыях у памежнай з Беларуссю зоне.
Пастанова МУС Польшчы мае набыць моц 13 чэрвеня і будзе дзеяць 90 дзён.
Агулам абмежаванні ахопяць участак працягласцю 60,67 км у межах тэрыторыяў памежных заставаў у Нараўцы, Белавежы, Дубічах-Царкоўных і Чаромсе. Паводле глыбіні абмежаванні будуць нераўнамернымі: на ўчастку працягласцю каля 44 км забароненая зона ахопіць 200 м углыб краіны ад лініі дзяржаўнай мяжы, а на ўчастку працягласцю каля 16 км у зоне запаведнікаў – 2 км ад мяжы.
У міністэрстве падкрэсліваюць, што абмежаванні пераважна не будуць датычыць населеных пунктаў і турыстычных маршрутаў, каб не ўскладняць жыцця мясцовым жыхарам, турыстам і бізнесу.
У МУС Польшчы дадаюць, што абмежаванне прысутнасці старонніх асобаў у зоне службовых дзеянняў накіраванае на запэўніванне бяспекі і спыненне дзейнасці кантрабандыстаў, якія спрыяюць незаконнай міграцыі.
Глеб Нержын belsat.eu
