Ва Украіне загінуў ваяр з Палка Каліноўскага. Яшчэ некалькі беларусаў параненыя
Полк імя Кастуся Каліноўскага паведаміў пра гібель чарговага беларускага добраахвотніка ў баях з расейскай агрэсіяй ва Украіне. Імя загінулага не называецца.
Як адзначаецца, ваяр загінуў 7 лістапада падчас выканання баявой задачы. Таксама падчас бою былі параненыя некалькі іншых ваяроў. У палку паведамляюць, што іх эвакуявалі з поля бою і іх жыццю нічога не пагражае.
«Смерць нашага пабраціма – гэта чарговая ахвяра беларускага народу ў вайне супраць расейскай агрэсіі», – заявілі ў палку.
З 24 лютага ў баях ва Украіне загінуў больш як тузін беларускіх добраахвотнікаў, якія ваявалі ў розных фармаваннях у складзе ЗСУ. Сярод іх – Ілля Літвін Хрэнаў, Аляксей Тур Скобля, Зміцер Тэрор Апанасовіч, Зміцер Ганс Рубашэўскі, Канстанцін Фенікс Дзюбайла, Іван Брэст Марчук, Павел Волат, Аляксей Жнец Вешчавайлаў і Міхаіл Юнгер Шавельскі.
Смерць Васіля Сябро Парфянкова, Вадзіма Папіка Шатрова і Васіля Атама Грудавіка афіцыйна не пацверджана. Таксама вядома пра смерць яшчэ трох беларускіх ваяроў, імёны якіх не называюцца.
Якуб Хруст belsat.eu
