Кіраўнік МЗС Вялікай Брытаніі стаўся ахвяраю пранкераў. Яму пазваніў нібыта Парашэнка
Пра відэазванок пранкераў Дэйвіду Кэмэрану паведаміла міністэрства замежных справаў Вялікай Брытаніі. У ведамстве запэўнілі, што размова не была працяглаю, аднак не ўдакладнілі, што дыпламат паспеў сказаць за гэты час. Невядомыя звязаліся з міністрам ад імя былога прэзідэнта Украіны Пятра Парашэнкі, перадае тэлерадыёкарпарацыя ВВС.
«Міністр замежных справаў шкадуе аб сваёй памылцы, але лічыць важным паведаміць пра такія паводзіны і ўзмацніць змаганне з дэзынфармацыяй», – адзначаецца ў паведамленні МЗС Вялікай Брытаніі.
Паводле ведамства, пранкеры дамаўляліся аб размове тэкставымі паведамленнямі, і падчас відэазванку на экране з’явілася асоба, вонкава падобная на колішняга прэзідэнта Украіны Пятра Парашэнку.
Размова не была працяглаю, Дэйвід Кэмэран спыніў яе, калі суразмоўца пачаў прасіць кантакты іншых асобаў.
У МЗС патлумачылі, што пастанавілі абнародаваць інфармацыю аб махлярстве на той выпадак, калі «відэа з міністрам зазнае маніпуляцыі і будзе выкарыстанае», а таксама каб іншыя асобы ведалі пра такую пагрозу.
У ведамстве пры гэтым не ўдакладнілі, як пранкерам удалося дамовіцца пра размову, колькі яна доўжылася і што міністр паспеў сказаць «Парашэнку».
Хто стаіць за падманам, пакуль не вядома. Расейская служба ВВС не выключае, што гэта могуць быць Аляксей Сталяроў і Уладзімір Кузняцоў, вядомыя як «Лексус» і «Ваван», яны не аднойчы размаўлялі з брытанскімі чыноўнікамі.
Дэйвід Кэмэран не ўпершыню стаўся ахвяраю махляроў. У 2015 годзе, калі ён быў прэм’ер-міністрам, яму пазваніла асоба, якая назвалася Робэртам Хэнігэнам – у той час ён узначальваў Цэнтр урадавай сувязі. Кэмэран паклаў слухаўку, калі зразумеў, што яго падманваюць. Пасля таго выпадку, як паведамлялася, былі перагледжаныя адмысловыя працэдуры бяспекі.
Сцяпан Кубік belsat.eu
