«Белсат» паглядзеў на цэны сезонных прадуктаў у Менску, Варшаве і Вільні цяпер і год таму, а таксама на сярэднія заробкі ў Беларусі, Польшчы і Літве. Аказваецца, палякі і літоўцы могуць накупіць бульбы ўтрая больш, чым беларусы!
У Беларусі бяда, з якой пасмяюцца замежнікі: бульбу было не купіць! На момант публікацыі яна пачынае вяртацца ў крамы, але па такіх цэнах, што дранікаў не захочацца. Беларусы вінавацяць клімат, чыноўнікі вінавацяць пастаўнікоў. І з клубніцамі нешта не так: беларускія трускаўкі значна даражэйшыя за замежныя – на ўзроўні журавінаў.
Бульба хаваецца на Камароўцы, кажуць менчукі. Паглядзелі, якія цэны на Камароўскім рынку беларусы паказваюць у сацсетках, і схадзілі на рынкі ў Варшаве і Вільні. Вынік такі:
Для аналізу бралі мінімальныя цэны на прадукты прыстойнай якасці. Напрыклад, імпартныя клубніцы на менскай Камароўцы бываюць і за 12,90, і за 13, а беларускія – за 35–45 рублёў. То лічым па 12,90. Замежныя цэны пералічваем у беларускія рублі паводле курсу Нацыянальнага банку Беларусі. І дзівімся: бульба таннейшая што ў Варшаве, што ў Вільні!
У мінулым красавіку мы глядзелі цэны на той самы набор прадуктаў. Змены ўражваюць:
- агуркі ў Менску патаннелі на 39 %;
- бульба ў Менску зрабілася даражэйшаю на 122 %;
- клубніцы ў Менску патаннелі на 8 %;
- кроп і пятрушка ў Менску патаннелі на 20 %;
- радыска ў Менску падаражэў на 47 %;
- зялёная цыбуля ў Менску прадаецца па той жа цане;
- цюльпан у Менску падаражэў на 67 %.
Калі параўноўваць цэны ў пераводзе на беларускія рублі, то ў Варшаве істотна падаражэлі клубніцы (+ 63 %) і радыска (+ 95 %), агуркі і кроп (+ 22 %), патаннелі пятрушка (– 35 %) і цыбуля (– 19 %). У Вільні істотна патаннелі агуркі і цыбуля (– 51 %), а таксама бульба (– 42 %), моцна падаражэлі кроп, пятрушка і цюльпаны (+ 47 %), а таксама клубніцы (+ 31 %). Але трэба ўлічваць, што летась мы закупаліся ў красавіку, сёлета – у траўні.
Цэны трэба суадносіць з заробкамі. Самыя свежыя лічбы сярэдняга налічанага заробку (да выліку падаткаў і збораў) у пераліку на беларускія рублі паводле курсу Нацыянальнага банку Беларусі такія:
- Беларусь – 2601,8 рубля (звесткі за сакавік-2025; летась мы лічылі заробак за люты-2024, ён быў роўны 2025,70 рубля);
- Польшча – 6875,15 рубля (8613 злотых, звесткі за люты-2025; летась у лютым-2024 было 7979 злотых, або 6518,12 рубля);
- Літва – 7973,36 рубля (2335,9 еўра, IV квартал 2024 года; летась за IV квартал 2023 года было 2110 еўраў, або 7342,17 рубля).
Такім чынам, наш набор прадуктаў можна купіць 87 разоў на беларускі сярэдні заробак «бруднымі» (год таму можна было толькі 72 разы), на польскі – 183 разы, на літоўскі – 141 раз. І на той заробак «бруднымі» можна купіць 650 кг бульбы ў Менску, 2153 кг у Варшаве і 2335 кг у Вільні.
Як гэта выглядае ў Варшаве
Як гэта выглядае ў Вільні
Як выглядаюць «залатыя» клубніцы ў Менску
На Камароўскім рынку кошты на трускаўкі сягаюць 45 рублёў.
Цэны на цюльпаны апошнім часам мала абмяркоўвалі ў Беларусі, але шмат абмяркоўвалі «інстаграмнае» поле цюльпанаў у Тышкавічах пад Пінскам. За тое, каб пусцілі пафатаграфавацца ў «беларускай Галандыі», прасілі 50 рублёў. Атракцыён «працаваў» да 10 траўня: пасля фермерская гаспадарка пачала збіраць ураджай.
Алесь Наваборскі belsat.eu
