Адвакаты Дор'яна С., які згвалтаваў і забіў беларуску Лізу, называлі пажыццёвае зняволенне для яго вельмі суровым выракам і заяўлялі: не было даказана, што ў момант злачынства ён быў у прытомным стане.
Апеляцыйны суд у Варшаве паведаміў «Белсату», што тэрмін разгляду апеляцыйнай скаргі грамадзяніна Польшчы Дор’яна С. на пажыццёвы прысуд за забойства беларускі Лізы планаваны на канец жніўня 2025 года.
У студзені Акруговы суд Варшавы прызначыў Дор’яну С. пажыццёвае зняволенне і абавязаў яго выплаціць 200 тысяч злотых (каля 48 тысячаў долараў у пераліку) пацярпеламу боку – хлопцу забітай.
Пракурор палічыў прысуд справядлівым і не збіраўся абскарджваць. Пра планы падаць апеляцыю паведамілі раней адвакаты фігуранта справы. Яны напіраюць: не было даказана, што ў момант злачынства ён быў у прытомным стане.
Дор’ян С. прызнаваў віну толькі часткова – у згвалтаванні, а не забойстве. У час суда абвінавачаны прасіў прабачэння за забойства і заяўляў, што ён не хацеў ані забіваць, ані гвалтаваць сваёй ахвяры, а толькі абрабаваць. Ён дэталёва апісаў, як душыў дзяўчыну, і расказаў, што гвалціў ужо непрытомную, пасля згвалтавання забраў банкаўскія карткі і тэлефон ахвяры. Казаў, што потым «не пазнаваў сябе». Выказваў здагадку, што да злачынства яму «нешта падсыпалі» ў алкаголь у бáры, бо «не ведаў, чаму згвалціў».
Запіс камеры назірання даў падставы зрабіць іншыя высновы, падкрэсліваў суддзя: ён не ўцякаў пасля рабавання, а выразна намераваўся ўчыніць згвалтаванне. Пасля згвалтавання Дор’ян сабраў рэчы і, паводле суддзі, пайшоў «спакойна і ўпэўнена».
Злачынства ў цэнтры Варшавы адбылося летась у ноч на 25 лютага. Паводле следства, Дор’ян С. згвалтаваў беларуску і намагаўся яе задушыць. Дзяўчыну шпіталізавалі ў крытычным стане, праз шэсць дзён яна памерла.
Лізу пахавалі на Паўночных могілках у Варшаве. Ейнае забойства справакавала вулічныя акцыі і шырокія дыскусіі ў Польшчы пра змены законаў і бяспеку жанчын, узмацненне пакарання за згвалтаванне.
Дар’я Форман, Алесь Наваборскі belsat.eu
