Набліжаюцца святы, і беларусы зноў плануюць масавыя паездкі праз паўночную і заходнюю межы. Мы паглядзелі, што там адбываецца.
Што ў афіцыйных крыніцах
Паводле Памежнага камітэту Беларусі, чэргі на выезд з Беларусі 18 красавіка такія:
• «Грыгораўшчына – Патэрніекі» (Латвія). Няма чаргі легкавікоў і аўтобусаў, у чарзе цяжкавікоў – 380–400 аўтаў.
• «Каменны Лог – Мядзінінкай» (Літва). У чарзе 50–100 легкавікоў, 420–430 цяжкавікоў, чаргі аўтобусаў няма.
• «Беняконі – Шальчынінкай» (Літва). У чарзе 20–60 легкавікоў, 460–470 цяжкавікоў, чаргі аўтобусаў няма.
• «Берасце – Тэрэспаль» (Польшча). Няма чаргі легкавікоў і аўтобусаў (яны раптоўна зніклі 16 красавіка, але ў мінулую пятніцу даходзілі да 750 легкавікоў і 20 аўтобусаў).
• «Казловічы – Кукурыкі» (Польшча). «Грузавы» пераход, у чарзе 200–450 аўтаў.
Паводле польскіх памежнікаў, раніцаю 18 красавіка на выезд з Польшчы ў Беларусь час чакання для аўтобусаў – 5 гадзінаў, легкавікоў – 6 гадзінаў, грузавікоў (на «Кукурыках») – 4 гадзіны.
Паводле літоўскіх памежнікаў, час чакання выезду з Літвы ў Беларусь у Мядзінінкаі такі: да адной гадзіны для аўтобусаў, каля 2159 гадзінаў для цяжкавікоў (іх у чарзе 173), без чакання для легкавікоў. У Шальчынінкаі: да адной гадзіны для аўтобусаў, каля 2159 гадзінаў для цяжкавікоў (іх у чарзе 184), без чакання для легкавікоў.
У латвійскіх памежнікаў лічыльнік не працуе, але паводле грузавога парталу Cargo.lv, на пераход мяжы ў Беларусь стаіць чарга з 380 цяжкавікоў.
Што пішуць у чатах
Рэальная сітуацыя з чэргамі на мяжы адрозніваецца ад той, якую паказваюць афіцыйныя звесткі. «Белсат» пачытаў, што беларусы пішуць у чатах.
Беларусь – Латвія
Мяркуючы з чатаў, на гэтым пераходзе па латвійскі бок чэргаў амаль не было. Але і рух машынаў быў невялікі: за содні – 72. Магчыма, рэч у тым, што Латвія нядаўна ўзмацніла патрабаванні для пераходу мяжы ў абодва бакі.
Адзін карыстальнік піша: прыехаў ноччу на латвійскі пункт пропуску, перад шлагбаумам нуль машынаў, на тэрмінале дзве машыны, «пятнаццаць хвілін – і мы ў РБ», «больш часу заняло выпісванне страхоўкі». Ён адзначае, праўда, што машына была на польскіх нумарах. У ноч на 18 красавіка невялікая чарга ўтварылася: выезду з Латвіі чакалі 11 легкавікоў і 3 аўтобусы. Але за дзве гадзіны чарга практычна знікла. На аўтобусе з 50 пасажырамі мяжу прайшлі за дзве гадзіны. На беларускім баку, як піша іншы падарожнік, было «бітма»: «тры каналы, машынаў дзесяць у кожным». Ды паводле мерак іншых памежных пераходаў, гэта зусім не «бітма».
Беларусь – Літва
Карыстальнікі наракаюць на «Шальчынінкай»: чарга ў бок Беларусі рухаецца слаба, памежнікі «павольна працуюць», «набіваюць поўны КПП і потым правяраюць прыкладна 2,5 гадзіны». У чарзе з літоўскага боку чакае некалькі дзясяткаў, да сотні машынаў, прайсці мяжу можна за 15 гадзінаў, калі пашанцуе – за 11 з паловай. Калі ехаць аўтамабілем з Беларусі ў Літву праз «Беняконі – Шальчынінкай», давядзецца чакаць 16–17 гадзінаў.
Перад пунктам пропуску «Мядзінінкай» стаіць да сотні аўтамабіляў, чакаць перад пунктам пропуску можна каля 5 гадзінаў, затым яшчэ пад 3,5 гадзіны на пашпартным кантролі, на ўвесь праход мяжы ў бок Беларусі легкавіком – ад 8,5 да 11 гадзінаў. З Беларусі ў Літву праз «Каменны Лог» легкавіком давядзецца стаяць 10 гадзінаў толькі ў зоне чакання. Пераход мяжы на аўтобусе з Літвы ў Беларусь займае 3–4 гадзіны, з Беларусі ў Літву можна праскочыць за паўтары гадзіны, а можна чакаць і 4 гадзіны. З увагі на блізкія святы раяць закладваць на дарогу запас 12–18 гадзінаў.
Беларусь – Польшча
У чарзе з Польшчы ў Беларусь хуткасць руху вымяраюць не кіламетрамі на гадзіну, а гадзінамі на кіламетр. Уначы чарга рухалася з хуткасцю 3–5 гадзінаў на кіламетр. Чарга расцягнулася на больш як 2 км, чакае каля 250 аўтамабіляў. На пераход мяжы легкавіком у Беларусь можа сысці ад 18 да 22 гадзінаў. Аўтобусам з перасадкай у бліжэйшы да шлагбауму пераход мяжы ў Беларусь займае ад 5,5 да 8 гадзін, перасадка каштуе 100 злотых. Без перасадкі – больш за 12 гадзінаў. У чарзе стаяць два-тры дзясяткі аўтобусаў – як піша адзін падарожнік, «усё не так страшна».
Чаргі на беларускім баку цяпер не відаць, можна праехаць мяжу ўсяго за тры з паловай гадзіны. Але яшчэ 16 красавіка з улікам выкліку з зоны чакання праход мяжы займаў да 27 гадзінаў – калі пашанцуе. На аўтобусе прайсці мяжу ў Польшчу можна за 4–8 гадзінаў, але калі не пашанцуе, то будзе больш за 10 гадзінаў. Варта памятаць: летась перад вялікімі выходнымі чэргі вырасталі да 300 легкавікоў.
Нагадаем, што наперадзе яшчэ даўжэйшыя святы. На наступным тыдні субота, 26 красавіка, будзе працоўная, выходнымі днямі будуць 27, 28 і 29 красавіка (29-га Радаўніца ў праваслаўных), затым перапынак на працу 30 красавіка, выходны 1 траўня, зноў праца 2-га, выходныя 3 і 4 траўня, чатыры працоўныя дні, выходныя 9, 10 і 11-га. Можна чакаць, што пэўная частка беларусаў, хто мае візы, захоча паехаць у Еўразвяз, а беларусы з эміграцыі заплануюць паездкі дамоў.
«Белсат» сочыць за сітуацыяй.
Алесь Наваборскі belsat.eu
